Fréttir

Hjá Heilbrigðiseftirliti Norðurlands vestra eru 134 gististaðir á skrá. Flestir þeirra eru smáir, eða 84 af þessum 134 og fá þeir skoðun annað hvert eða jafnvel fjórða hvert ár. Þar er m.a. um að ræða litla gistiskála og gistiheimili án veitingasölu, heimagistingu og minni fjallaskála.

Anna Pálína Þórðardóttir hefur verið kosin Norðvestlendingur ársins 2015 af lesendum Feykis. Anna, sem varð áttræð 8. apríl sl., gaf á síðasta ári út bókina Lífsins skák sem inniheldur endurminningar hennar.

Taylor Swift er með ólíkindum hæfileikarík tónlistarkona. Þegar hún var 10 ára gömul ku tölvuviðgerðarmaður hafa kennt henni þrjú grip á gítar og kveikti hjá henni áhugann á að búa til tónlist. 11 ára gömul reyndi hún fyrst fyrir sér í Nashville, árið 2000, en án árangurs en það má segja að frá árinu 2005 sé tónlistarferill hennar ein óslitin sigurganga. Hér er myndband sem fylgir nýjasta singölnum af plötunni 1989, Out of the Woods.

Körfuboltinn fer aftur af stað eftir jólafrí í kvöld, en þá mæta Breiðhyltingarnir í ÍR í Síkið og etja kappi við heimamenn í liði Tindastóls. Leikurinn hefst kl. 19:15 og vonandi verða Stólarnir straumlínulagaðir eftir fríið því nú er ekkert annað í spilunum en að hífa sig upp stigatöflu Dominos-deildarinnar.

Baráttan fyrir lægri húshitunarkostnaði hefur staðið lengi. Núna getum við fagnað því að mikilvægum áfanga er náð. Með lögum sem tóku gildi nú um áramótin og lögum sem lúta að jöfnuði í orkukostnaði dreifbýlis og þéttbýlis, eru stigin stærri og varanlegri skref í þessum efnum en við höfum lengi séð.

Í tilkynningu frá Fjölbrautaskóla Norðurlands vestra segir að skráningu í fjarnám á vorönn 2016 ljúki á morgun, föstudaginn 8. janúar. Fjölmargir áfangar eru í boði í fjarnámi.

Í upphafi árs lítum við yfir farinn veg og stígum á stokk og heitum á okkur sjálf að ná árangri í þeim verkefnum sem við erum að kljást við hverju sinni. Á Alþingi eru það fjárlögin sem endurspegla stefnu hverrar ríkisstjórnar og stjórnarandstaðan glímir við að ná fram breytingum á í takt við stefnu sinna flokka.

Eins og Feykir hefur fjallað um var nefnd um sameiningu hestamannafélaganna í Skagafirði að störfum stóran hluta síðasta árs. Ákveðið var að stofna nýtt hestamannafélag í Skagafirði við sameiningu félaganna þriggja sem fyrir voru, Svaða, Léttfeta og Stíganda. Þá hefur verið ákveðið að nýtt félag beri nafnið Skagfirðingur.

Karlakór Bólstaðarhlíðarhrepps og Rökkurkórinn, halda sína árlegu nýársgleði í Húnaveri nk. laugardag kl. 20:30. Samkvæmt Facebook-síðu viðburðarins er dagskráin hefðbundin, „eðal lambakjöt af húnvetnskum heiðum a l a mamma, söngur, grín og glens og svo dansleikur með Geirmundi Valtýssyni til kl. 2:00.“

Frjálsíþróttadeild UMFT hefur nú dregið í jólahappdrættinu. Frjálsíþróttahópurinn þakkar fyrirtækjum og einstaklingum í Skagafirði fyrir góðar viðtökur og stuðninginn.