Fréttir

Kaupfélag Skagfirðinga færði í gær grunnskólunum á Hofsósi, í Varmahlíð og á Sauðárkróki ásamt Fjölbrautarskóla Norðurlands vestra, hátæknibúnað, til örvunar nýsköpunar, að gjöf.

Nú fara jólasveinarnir að tínast til byggða hver af öðrum og sá fyrsti, Stekkjastaur, leggur af stað í kvöld og kíkir á skóbúnað í gluggum barna í nótt. Þá er nú við hæfi að spila lagið um það þegar sveinki mætir á svæðið.

Undanfarið hefur nýtt hverfi verið í byggingu við Lindarveg á Hvammstanga. Er það staðsett nærri göngustíg við Syðri-Hvammsá og er hann eina gönguleiðin að og frá hverfinu.

Ekkert verður af fyrirhuguðum flugferðum hollensku ferðaskrifstofunnar Voigt Travel í vetur. Áætlun gerði ráð fyrir 10 flugferðum frá Amsterdam til Akureyrar í febrúar og mars 2021, en vegna heimsfaraldurs Covid-19 munu þær falla niður.

Matvælastofnun varar við neyslu á tveimur framleiðslulotum af 5-kornablöndu frá Svansö sem Kaupfélag Skagfirðinga flytur inn. Varnarefnið etýlen oxíð greindist í vörunni sem er ekki leyfilegt til notkunar í matvæli. Fyrirtækið hefur innkallað vöruna af markaði með aðstoð Heilbrigðiseftirlits Norðurlands vestra.

Styrkir hafa verið veittir úr stefnumótandi byggðaáætlun fyrir árin 2018-2024 til sértækra verkefna sóknaráætlanasvæða. Tvö verkefni á Norðurlandi vestra hljóta styrk á árinu 2021. Þetta kemur fram á vef Samtaka sveitarfélaga á Norðurlandi vestra.

Á heimasíðu Minjastofnunar segir frá því að gamla íbúðarhúsið á Höfða í Skagafirði fæst gefins gegn því að vera gert upp á nýjum stað. Húsið var byggt árið 1892 og er því aldursfriðað samkvæmt lögum um menningarminjar nr. 80/2012. Það þýðir að hvorki má rífa það né breyta á nokkurn hátt án samþykkis Minjastofnunar Íslands.

Ólöf Ólafsdóttir á Tannstaðabakka sem undanfarin ár hefur saumað bútasaumsteppi og selt til styrktar Velferðarsjóðs Húnaþings vestra kom á fund stjórnar sjóðsins sl. mánudag og færði sjóðnum að gjöf afrakstur ársins, 600.000 krónur.

Það er sosum ekki búið að gefa það út hvort jólin í ár verði hvít eða rauð en veðrið í dag gefur tilefni til að ætla að sá snjór sem þegar er kominn á láglendið muni minnka eða hverfa með öllu. Eitt lag fannst í einfaldri leit Feykis á Google þar sem sungið er um rauð jól en þá er reyndar ekki verið að syngja um snjólausa jörð.

Kannski kemur það einhverjum á óvart að heyra að fleiri íþróttir en körfubolti og fótbolti séu stundaðar á Króknum. Þetta er staðreynd og nú nýverið bættist enn í íþróttaflóruna þegar Helgi Jóhannesson landsliðsþjálfari í badminton stofnaði badmintondeild innan raða Ungmennafélagsins Tindastóls.