Fréttir

Sumarið 2020 býður Ferðamáladeild Háskólans á Hólum upp á sumarnám í völdum námsgreinum á sviði viðburðastjórnunar og ferðamálafræði. Umsóknarfrestur rennur út á miðnætti í kvöld svo áhugasamir ættu að drífa sig í að skrá sig. Öll námskeiðin eru kennd í fjarnámi en staðbundnar lotur geta verið hluti námsins.

Þórdís Kolbrún Reykfjörð Gylfadóttir, iðnaðar- og nýsköpunarráðherra, og Sigfús Ingi Sigfússon, sveitarstjóri Sveitarfélagsins Skagafjarðar, skrifuðu í dag undir viljayfirlýsingu um uppbyggingu koltrefjaframleiðslu í Skagafirði. Samræmist viljayfirlýsingin stefnu stjórnvalda um eflingu nýfjárfestingar í íslensku atvinnulífi og samkeppnishæfni Íslands á sviði nýfjárfestingar, sérstaklega á dreifbýlum svæðum líkt og á Norðurlandi vestra.

Á fundi sveitarstjórnar Sveitarfélagsins Skagastrandar þann 19. maí sl. voru ársreikningar sveitarsjóðs og stofnana þess fyrir árið 2019 lagðir fram til seinni umræðu. Rekstrarniðurstaða var jákvæð um 22,8 milljónir króna en árið 2018 var hún einnig jákvæð, þá um 16,5 milljónir.

Húnavatnshreppur auglýsir sumarstarf fyrir einn námsmann. Starfið er stutt af átaksverkefni ríkisstjórnarinnar til fjölgunar sumarstarfa og snýr það að átaksverkefni við Klaustursstofu við Þingeyrar. Meðal verkefna verður leiðsögn og almenn fræðsla á svæðinu.

Hin árlega gleðiganga Árskóla á Sauðárkróki fór fram í dag í ekta íslensku vorveðri, sunnan roki og rigningu á köflum. En það var ekki að sjá á andlitum grunnskólanemanna að veðrið væri ekki eins og best væri á kosið þar sem flestir voru skælbrosandi og glaðbeittir enda um gleðigöngu að ræða.

Hún var óskemmtileg aðkoman við útsýnisstað Jóns Ósmanns við Vesturós Héraðsvatna á dögunum en búið var að skemma styttuna af Ósmann með málningarspreyi, sem erfitt getur reynst að laga án mikils tilkostnaðar.

Nú líður að skólalokum þessa einkennilega skólaárs. Í morgun mættu 10. bekkingar eldsnemma og snæddu morgunmat í skólanum með foreldrum sínum. Að honum loknum tóku þau höfðinglega á móti starfsfólki skólans er það mætti til vinnu, með lófaklappi, rauðum dregli, söng, og blómum, svo vel að fagnaðarlætin heyrðust víða um bæinn.

Skagfirðingurinn Darri Freyr Atlason hefur verið ráðinn þjálfari Íslandsmeistara karla í körfubolta og tekur við af hinum sigursæla þjálfara Inga Þór Steinþórssyni sem sagt var upp á dögunum. Sá átti tvö ár eftir af samningi sínum við Vesturbæjarliðið.

Komið var að langþráðri stund þegar Sundlaug Sauðárkróks var formlega opnuð eftir fyrri áfanga gagngerra endurbóta sem staðið hafa yfir tvö síðustu ár. Miklar breytingar hafa verið gerðar á húsnæðinu þar sem starfsaðstæður og aðgengi eru öll til fyrirmyndar. Sundlaugin er ein af fáum sem státar af sér klefa fyrir þá sem ekki geta nýtt sér almenna karla- eða kvennaklefa en mikil þörf hefur skapast eftir þannig aðstöðu síðustu ár í sundlaugum landsins.

Fyrir skömmu var efnt til leiks á Facebook síðu Samtaka sveitarfélaga á Norðurlandi vestra, SSNV, þar sem fólk var beðið um að skrá í athugasemd það sem því líkaði best við að búa á Norðurlandi vestra. Þátttaka í leiknum var mjög góð, að því er segir á vef SSNV og voru ástæðurnar fjölbreyttar þó rauði þráðurinn hafi verið fólkið og náttúran.