Fréttir

Ísjaki sást í miðjum Skagafirði í morgun og sást hann vel úr Fljótunum. Jakinn virðist vera á ferð til suðvesturs og er því að fjarlægjast land í augnablikinu en líklegt er að hann bráðni á næstu dögum. 

Í dag mun dagskrá Unglingalandsmótsins vera alveg frá kl. 08:00 til kl. 23:00 og nóg verður um að vera á Króknum. Á keppnisdagskránni er badminton, grashandbolti, fótbolti, pílukast, stafsetning og glíma. Í boði fyrir alla fjölskylduna er t.d. fyrirlestur Margrétar Viðarsdóttur næringarfræðings, fjöruhlaup þar sem boðið verður upp á 5 km og 7 km, Latibær mætir á svæðið, fjölskyldufjör í íþróttahúsinu og síðan mun DJ Ragga Hólm enda kvöldið í partítjaldinu. Fólk er hvatt til þess að kíkja á dagskrána, en fyrst fékk Feykir Blönduósinginn Birgi Stein til þess að segja frá því hverju hann er spenntastur fyrir á mótinu. Birgir er á ellefta ári, sem þýðir að hann er að keppa á sínu fyrsta Unglingalandsmóti.

Athygli bæjarbúa og gesta er vakin á því að búið er að setja upp tímabundnar þrengingar á Skagfirðingabraut á Sauðárkróki. Aðgerðirnar eru liður í því að draga úr aksturshraða og tryggja öryggi á svæðinu.

Þá er komið að stórmótinu sem Unglingalandsmótið er, tjaldsvæðið á Nöfunum er að fyllast og setmningin er mikil. Í dag er keppt í alls kyns greinum eins og golfi, krakkahreysti og júdó. Mótið mun þó fara á fullt á morgun þar sem dagskráin verður stút full frá átta um morguninn til ellefu um kvöldið. Kvölddagskráin í partítjaldinu er heldur betur spennandi einnig en hægt er að taka þátt í danskeppni þar sem gleðin ræður ríkjum. Baldvin Orri Dagsson frá Víðiholti í Skagafirði ætlar að keppa í þremur greinum með liðinu Mjólkurbottarnir. Baldvin sem er alveg að verða tólf ára er að taka þátt á fyrsta Unglingalandsmótinu sínu.

Á heimasíðu Húnaþings vestra kom fra að í lok árs 2024 tók Leigufélagið Bríet yfir fjórar íbúðir í eigu Húnaþings vestra á Gilsbakka á Laugarbakka. Hluti af samkomulaginu um yfirtöku eignanna var að Bríet réðist í endurbætur á húsunum og gerði upp íbúðirnar sem voru komnar á nokkuð viðhald. Leigufélagið hefur nú lokið við endurbætur á fyrstu íbúðinni og standa yfir sprunguviðgerðir að utan. Sömuleiðis er gert ráð fyrir að húsin verði máluð með haustinu.

Í 15. umferð 2. deildar karla mættust Kári og Kormákur/Hvöt í Akraneshöllinni þann 29. júlí. Leiknum lauk með 1-1 jafntefli, sem var sjötta jafntefli Kormáks/Hvatar á tímabilinu. Eftir leikinn situr liðið í sjötta sæti deildarinnar með 21 stig – fimm sigra, sex jafntefli og fjögur töp.

Aline Garmune er spænsk tónlistarkona sem er búsett á Sauðárkróki. Í sumar hefur hún verið á tónlistarferðalagi með það að markmiði að deila tónlist sinni og menningu með íslensku samfélagi og hefur verið að spila á kaffihúsum um Norður- og Austurland.

Athygli er vakin á tveimur gjörningum sem fara fram í tengslum við myndlistarsýninguna SLEPPA í listsalnum hAughúsi í Héraðsdal í Skagafirði næstkomandi sunnudag, 2. ágúst. Þar verður tónlistargjörningurinn FINNA eftir Heidu Karine Jóhannesdóttur Mobeck og Kari Elise Mobeck kl. 15:00. Auk þess verður boðið upp á þátttökugjörninginn JÖKLAMJÓLK; krydd í straumi eftir Borghildi Óskarsdóttur, Ósk Vilhjálmsdóttur og Huldu Ragnhildi Hjálmarsdóttur, kl.16:00.

Hjördís Halla Þórarinsdóttir var Íslandsmeistari í fimmgangi í unglingaflokki á dögunum. Mikil spenna var í úrslitunum en Hjördís sem keppti á Fáki frá Oddhóli stóð uppi sem sigurvegari með einkunnina 6,79. „Ég og Fákur erum búin að vera saman síðastu tvö ár. Hann er 12 vetra gamall, undan Jarli frá Árbæjarhjáleigu og Fíu frá Oddhóli. Við erum farin að ná vel saman,“ sagði Hjördís í samtali við Feyki en hún svaraði nokkrum spurningum.

Hattarmenn frá Egilsstöðum heimsóttu topplið Tindastóls í gær, 28. júlí, og hörkuleikur var spilaður á Sauðárkróksvelli. Lokamínúturnar voru dramatískar með skoti í slána og marki á síðustu mínútu. Leikurinn endaði með 2-3 sigri Hattarmanna.