Fréttir

Annað kvöld, fimmtudaginn 5. desember, heldur Einar Ó. Þorleifsson, náttúrufræðingur hjá Náttúrustofu Norðurlands vestra, fyrirlestur sem nefnist Fuglarnir í garðinum og er hluti af fyrirlestraröð Náttúrustofu Norðurlands vestra. Hann verður fluttur í húsnæði Náttúrustofu að Aðalgötu 2 á Sauðárkróki.

Ferðaþjónustuaðilar í Eyjafirði ætla að opna dyrnar upp á gátt sunnudaginn 7. des og verða með allskonar tilboð og skemmtilegheit fyrir gesti og gangandi fyrir jólin. Króksarinn Sesselja Barðdal er framkvæmdastjóri og eigandi vöfflu- og afþreyingarkaffihússins Kaffi Kú og einn hvatarmaður verkefnisins. Feykir sendi Sesselju spurningar og forvitnaðist um þennan tiltekna viðburð og kaffihúsareksturinn í sveitinni.

Opnað hefur verið fyrir umsóknir fyrir Eyrarrósina 2020 en Eyrarrósin er viðurkenning sem veitt er framúrskarandi menningarverkefnum, utan höfuðborgarsvæðisins, sem þegar hafa fest sig í sessi. Markmið Eyrarrósarinnar er að beina sjónum að og hvetja til menningarlegrar fjölbreytni, nýsköpunar og uppbyggingar á sviði menningar og lista. Byggðastofnun, Air Iceland Connect og Listahátíð í Reykjavík hafa staðið saman að verðlaununum frá upphafi, eða frá árinu 2005.

Markmaðurinn bráðefnilegi, Margrét Rún Stefánsdóttir, hefur verið valin á U15 landsliðsæfingar KSÍ sem fram fara dagana 9. – 11. desember í Skessunni, æfingasvæði FH í Hafnafirði. Margrét mun standa í marki meistaraflokks Tindastóls a.m.k. í vetrarmótunum eftir því sem Guðni Þór Einarsson, þjálfari, sagði í viðtali við Feyki fyrr í vetur.

Stór þáttur í jafnréttisbaráttu og kvenfrelsi hefur verið aukið fæðingarorlof og jafn réttur kynjanna til þess að vera með barni sínu þennan dýrmæta tíma í lífi foreldris og barns. Samfella í fæðingarorlofi og leikskóla er mikið jafnréttis- og velferðarmál sem vinstri menn hafa barist fyrir lengi.

Útgáfu Byggðasögu Skagafjarðar verður fagnað þriðjudaginn 10. desember, kl. 20:00 á Ketilási en út er komið níunda bindi í ritstjórn Hjalta Pálssonar og fjallar það um Austur Fljót, eða Holtshrepp hinn forna. Lesið verður úr nýju bókinni og flutt ávörp í tilefni útgáfunnar. Bókin verður til sýnis og sölu á staðnum og kostar eintakið 16.000 krónur. Allir eru velkomnir en íbúar í Fljótum og nærsveitum eru sérstaklega boðnir velkomnir og er aðgangur ókeypis og kaffi og meðlæti á boðstólum.

Byggðarráð Húnaþings vestra lagði fram bókun á fundi sínum í gær þar sem stjórnvöld eru eindregið hvött til þess að leggja til hliðar fyrirliggjandi áform um lagasetningu vegna stofnunar þjóðgarðs á miðhálendi Íslands. Bendir byggðarráð á að fjölmörg sveitarfélög hafa gert verulegar athugasemdir við eða hafnað alfarið framkomnum tillögum nefndar um stofnun þjóðgarðs á miðhálendinu, sem kynntar hafa verið í samráðsgátt stjórnvalda.

Stofnþing Bogfimisambands Íslands (BFSÍ) var haldið í Íþróttamiðstöðinni í Laugardal þann 1. desember sl. Með stofnun þessa nýja sérsambands eru sérsambönd ÍSÍ orðin 33 talsins.

Ársfundur Norðurstrandarleiðar – Arctic Coast Way var haldinn á Dalvík í síðustu viku. Á fundinum kynntu verkefnastjórarnir Christiane Stadler og Katrín Harðardóttir verkefnið og það starf sem unnið hefur verið á undanförnum misserum ásamt því að segja frá því sem framundan er.

Eins og bæjarbúar hafa kannski tekið eftir hafa fyrirtækin í Aðalgötunni á Sauðárkróki verið í samstarfi undanfarin misseri um að hafa aukaopnanir af og til og þá einkum á kvöldin. Hefur þá verið reynt að hafa líf og fjör í gamla bænum og/eða kósý stemningu til að hvetja bæjarbúa til að rölta um bæinn sinn, hittast og spjalla í rólegheitum og njóta samvista með náunganum. Ýmsar hugmyndir hafa verið ræddar á þessum samvinnuvettvangi sem sumar eru komnar í framkvæmd á meðan aðrar eru í vinnslu og/eða enn á hugmyndastigi.