Fréttir

Það sem af er þessu ári hafa eftirlitsdýralæknar Matvælastofnunar afhent átta einstaklingum á vegum SAH Afurða ehf. hæfnisskírteini í vernd dýra við aflífun. Opinberar kröfur eru þær að allir sem koma að meðhöndlun dýra fyrir og við slátrun hafi til þess þekkingu á dýravelferð, hegðun sláturdýra, hvernig aðbúnaði í sláturhúsi skuli háttað, deyfingaaðferðum og að geta metið meðvitund dýra og árangur blæðingar.

Slysa­varn­ar­fé­lagið Lands­björg stóð fyrir Safetravel deginum í átt­unda sinn síðastliðinn föstudag. Safetravel dagurinn er haldinn í því skyni að vekja at­hygli á um­ferðarör­yggi og standa slysavarna- og björgunarsveitir vaktina og spjalla við öku­menn víðsvegar um landið um ábyrgan akstur.

Á föstudagskvöldið fór Tindastóll í Vesturbæinn og mætti þar KR í átta liða úrslitum Mjólkurbikarsins kvenna. KR-ingarnir byrjuðu af miklum krafti en þetta jafnaðist út í seinni hálfleiknum, en eina mark leiksins kom á 9. mínútu og voru það KR sem skoruðu það og urðu lokaúrslitin 1-0 fyrir KR. Bikarævintýrinu lokið hjá Tindastólsstelpum en KR komið í undanúrslit.

Sagt er frá því á vef Sveitarfélagsins Skagafjarðar að ný og endurskoðuð matsviðmið hafi verið tekin í notkun við ytra mat á grunnskólum á vegum Menntamálastofnunar. Grunnskólinn austan Vatna var í hópi fyrstu grunnskólanna sem fóru í úttekt með nýju matsaðferðinni í september síðastliðnum en tíu grunnskólar eru metnir árlega.

Nú hefur verið lokið við lagningu grunnkerfis ljósleiðara í Húnavatnshreppi en undirbúningur verksins hófst árið 2015 og framkvæmdir árið eftir með því að lagðar voru stofn- og heimtaugar á bæi.

Í 6. tölublaði Feykis 2018 var skyggnst í handavinnuhornið hjá Pálínu Fanneyju Skúladóttur. Pálína hefur verið búsett á Laugarbakka frá árinu 2002 en hún er fædd og uppalin austur á Héraði. Hún starfar sem grunnskólakennari í hlutastarfi þar sem hún kennir m.a. tónmennt og jóga bæði í grunnskólanum og leikskólanum á Hvammstanga og er stundakennari við Tónlistarskólann. Ennfremur er hún organisti og kórstjóri á Hvammstanga og á Melstað og Staðarbakka.

Í þessum pistli og nokkrum þeim næstu ætla ég að fjalla um sögu keppna á hestum hér á landi. Í upphafi byggðar á landinu voru þó stundaðar keppnir sem fólust ekki í að keppt var á hestunum, þ.e. þeir voru ekki setnir, heldur var þeim att fram sem vígahestum og þeir slóust þar til annar lá dauður eða óvígur. Þetta er vitaskuld löngu aflagt en víða um heim þekktust og þekkjast jafnvel enn margs konar dýraöt. Verður ekki frekar um þetta fjallað hér en fyrir áhugasama er bent á bók sem ýmsir lesenda pistils þessa kannast eflaust við en það er bókin Faxi eftir dr. Brodda Jóhannesson, kunnan Skagfirðing, bókin kom út hjá Bókaútgáfunni Norðra á Akureyri árið 1947.

Í dag var kaupmaðurinn síungi á Sauðárkróki, Bjarni Haraldsson, sæmdur heiðursborgaranafnbót fyrstur allra í Sveitarfélaginu Skagafirði í veislu sem nú stendur yfir við verslun hans á Aðalgötunni. Aðeins tveir ættliðir hafa rekið verslunina þau 100 ár sem hún hefur verið starfrækt en faðir Bjarna, Haraldur Júlíusson sem verslunin er kennd við, setti hana á laggirnar árið 1919.

Nafn: Ingveldur Ása Konráðsdóttir. Starf / nám: Bóndi, þroskaþjálfi og sveitarstjórnarfulltrúi. Hvað er eftirminnilegast frá fermingardeginum? Þegar pabbi þurfti að taka allar spennurnar úr hárinu á mér með sína 10 þumalputta. Hélt að þetta myndi engan endi taka. Orð eða frasi sem þú notar of mikið? Sko...

Það er hún Jóhanna Helga Sigtryggsdóttir sem ætlar að bjóða okkur upp á girnilegar kræsingar þessa vikuna. Jóhanna býr á Hvammstanga en er ættuð af Vatnsnesi og úr Víðidal. Hún vinnur á leikskólanum Ásgarði og einnig í félagsmiðstöðinni Órion. Uppáhaldsmatur Jóhönnu er jólamaturinn, svínakjöt, brúnaðar kartöflur og meðlæti en hún segist hafa mjög gaman af matseld og að prufa alls konar uppskriftir. „Mér finnst gaman að elda góðan mat og bjóða vinum og ætla að vera duglegri við það í ár í nýja húsinu mínu,“ segir Jóhanna. Þátturinn birtist í 24. tbl. Feykis í júní 2017.