Fréttir

Ýmislegt hefur áunnist í endurvinnslumálum síðustu áratugi. Flokka á Sauðárkróki hefur verið miðstöð endurvinnslu fyrir okkur Skagfirðinga síðan starfsemi hófst árið 2008. Stefna Flokku vegna endurvinnslu er skýr; við flokkum til að halda umhverfi okkar hreinu, til að fullnýta efnivið, spara orku, „draga úr sorpi og ruslahaugum úti í náttúrunni [...] til að auka líkurnar á því að við getum skilað komandi kynslóðum jörð sem er enn lifandi, rík af auðlindum og velmeð farin” (af heimasíðu Flokku).

SAH Afurðir héldu aðalfund sinn þann 3. maí sl. þar sem ársreikningur félagsins fyrir árið 2017 var lagður fram og samþykktur. Á vefsíðu félagsins segir að hagnaður af rekstri ársins hafi numið 5,5 milljónum króna en síðast varð hagnaður á rekstri félagsins árið 2013. Velta síðasta árs var tæpir tveir milljarðar króna og bókfært eigið fé í árslok var neikvætt um 153,2 milljónir króna. Ársverk á reikningsárinu voru 52. Reiknað er með tapi á fyrsta þriðjungi yfirstandandi reikningsárs.

Í gær grilluðu Vinstri græn og óháð pulsur og bulsur í anddyri reiðhallarinnar á Sauðárkróki þar sem ýmis afþreying var í boði fyrir börnin. Rútu Rúntur um Skagafjörðinn verður svo á dagskránni á morgun laugardag og sunnudag

Þórhallur Guðmundsson, miðill, starfar fyrir Sálarrannsóknarfélag Skagafjarðar þessa helgina á Sauðárkróki. Þau mistök urðu í Sjónhorni að dagsetningar voru rangar eða öllu heldur mánuður. Þórhallur tekur á móti fólki í dag, föstudaginn 11. maí, laugardag 12. maí og þann 13. maí.

Það er bæði krefjandi og skemmtilegt verkefni að fara af stað með nýtt framboð til sveitastjórnarkosninga. Það er sérstaklega skemmtilegt að því leyti að maður verður mjög var við það hvað núverandi staða samfélagsins og framtíðarþróun þess er mörgum íbúum sveitarfélagsins mikið hjartans mál. Það er ýmislegt sem brennur á fólki en þar virðast leik- og grunnskólamál, skipulagsmál og fjármál sveitarfélagsins iðulega vera efst á baugi. Þessir þrír málaflokkar eru ByggðaListanum mjög hugleiknir og teljum við að þau málefni sem falla þar undir ættu að vera í algjörum forgangi.

Fjölbrautaskóli Norðurlands vestra komst í hóp fimm Fyrirmyndarstofnana árið 2018 í flokki stofnana með 50 starfsmenn eða fleiri. Þá fékk hann sérstaka viðurkenningu fyrir að vera hástökkvari í sínum flokki. Viðurkenninguna fær skólinn á grundvelli árlegrar könnuna á vegum SFR, sem er stéttarfélag í almannaþjónustu og er félagssvæði þess allt landið.

Sveitarfélagið Skagafjörður og Heilbrigðiseftirlit Norðurlands vestra standa nú í sameiningu fyrir hreinsunarátaki á Hofsósi. Átakinu er ætlað að standa dagana 10. - 14. maí og hefur verið óskað eftir samvinnu við íbúa, lóðareigendur og fyrirtæki og þeir beðnir að fjarlægja ónýta og óþarfa hluti í því skyni að gera þorpið sem snyrtilegast.

Þriðjudaginn 8. maí komu félagar í Veðurklúbbnum á Dalbæ saman til fundar í því skini að huga að veðurhorfum í maí mánuði. Fundurinn hófst kl. 13:55 og voru fundarmenn tíu talsins sem fóru yfir sannleiksgildi síðustu spár og voru fundarmenn að vonum sæmilega ánægðir með hvernig til hefði tekist. Að vísu hafði veður verið heldur kaldara en ráð var fyrir gert, en spáin vel innan skekkjumarka eins og gjarnan er sagt um spár af hvaða tagi sem þær svo sem eru.

Leiklistardeild Höfðaskóla á Skagaströnd frumsýnir í kvöld, miðvikudag 9. maí, klukkan 20:00 gamanleikinn Lífið er núna í Fellsborg á Skagaströnd. Leikritið heitir á frummálinu You Can’t Take It With You og var skrifað árið 1936 af þeim George S. Kaufman og Moss Hart. Það hefur verið sýnt áratugum saman í Bandaríkjunum og verið með vinsælustu verkum þar úti fyrir skólauppsetningar. Ástrós Elísdóttir þýddi verkið en að hennar sögn hefur það ekki verið sýnt oft hér á landi þó það hafi verið þýtt á íslensku fyrir 63 árum síðan og hafi orðið úr hjá leikhópnum að nýta ekki þá þýðingu heldur ráðast í nýja.

Orka náttúrunnar og N1 tóku í gær formlega í notkun nýja hlöðu með hraðhleðslu fyrir rafbíla við Ábæ, þjónustustöð N1 á Sauðárkróki. Hlaðan er sett upp með styrk frá Orkusjóði og í samstarfi við Vistorku, samstarfsvettvang norðlenskra sveitarfélaga og Norðurorku að ýmsum umhverfismálum. Þetta er 31. Hlaðan sem ON hefur sett upp víðsvegar um landið og sú áttunda sem er á þjónustustöð N1.