Fréttir

Körfuknattleiksdeild Tindastóls hefur ráðið Spánverjann frá Tenerife, Fernando Bethencourt Muñoz, sem aðstoðarþjálfara meistaraflokks karla næsta tímabil. Samningurinn er til eins árs með opnun á tveggja ára samning.

Á fundi sveitarstjórnar Skagastrandar sem haldinn var í gær, 29. júní, var lagt fram bréf frá sveitarstjóra Sveitarfélagsins Skagafjarðar frá 26. júní sl. Í bréfinu var gerð grein fyrir áformum Sveitarfélagsins Skagafjarðar og Skagabyggðar um að hefja formlegar viðræður um sameiningu sveitarfélaganna tveggja. Í bréfinu eru önnur sveitarfélög á svæðinu sem áhuga hafa á að ræða enn stærri sameiningu við Sveitarfélagið Skagafjörð og Skagabyggð boðin velkomin til viðræðna.

Hrönn Harðardóttir skrifar pistil á Kvennablaðið.is sem vakið hefur verðskuldaða athygli en þar segir hún á jákvæðan hátt frá tækifæri sem skapaðist út frá neikvæðum aðstæðum. Hrönn bjó á Sauðárkróki um tíma hjá foreldrum sínum, Herði Sigurjónssyni og Petru Jörgensdóttur. Hrönn segir að það geti verið frekar erfið blanda stundum þegar „kvíða-ég“ þráir öryggi og vita alltaf upp á hár hvað sé framundan á meðan „ævintýra-ég“ verður mjög fljótt þreytt á tilbreytingasnauðum hversdagsleikanum og „metnaðar-ég“ þráir að komast lengra.

Sveitarstjóri Blönduósbæjar fundaði nýlega með fulltrúum frá Borealis Data Center eins og kemur fram í skýrslu sveitarstjóra Blönduóss frá 13. júní sl. Fyrirtækið er á höttunum eftir hentugri staðsetningu fyrir gagnaver þar sem landrými er nægt og aðgengi að raforku gott. Fulltrúar fyrirtækisins hyggjast koma til Blönduóss í sumar og kanna aðstæður.

Ef við fáum ekki gott veður um helgina þá er um að gera að setja í tertu, kveikja á uppáhalds tónlistinni, setjast niður í þægilegan stól, upp með fætur, njóta tertunnar og ímynda sér að maður sé á sólarströnd í góðra vina hópi.

Samþykkt var á fundi sveitarstjórnar Svf. Skagafjarðar að breyta reglum um Hvatapeninga vegna íþrótta- og tómstundastarfs barna í sveitarfélaginu. Verið er að laga reglurnar að upptöku nýs skráningakerfis í gegnum Nóra, sem tekið var upp um síðustu áramót. Skilyrði þess að hægt sé að nýta Hvatapeningana er að um skipulagt íþrótta-, lista- eða æskulýðsstarf sé að ræða og sé stundað undir leiðsögn þjálfara, leiðbeinenda eða kennara.

Þetta myndband sprengdi krúttskalann hjá mér því það er alltaf svo gaman að sjá þegar börn og dýr getað notið tilvistar hvors annars. Hér eru bræðurnir Viktor Darri og Kristján Franz að fá sér súp með hestinum Yl í mestu makindum. Það var móðir þeirra, hún Stefanie Wermelinger, sem tók þetta upp og deildi á facebook síðunni sinni og hefur það vakið mikla lukku. Hún er menntaður reiðkennari og tamningarkona og eiginmaður hennar er Kristján Elvar Gíslason járningarmeistari, þau búa á Sauðárkróki.

Brautskráning frá Háskólanum á Hólum fór fram föstudaginn 9. júní sl. í Menningarhúsinu Miðgarði í Varmahlíð. Athöfnin var með hefðbundnum hætti, þar sem fléttað var saman stuttum ávörpum og tónlistaratriðum, auk brautskráninganna sjálfra. Á heimasíðu Háskólans á Hólum segir að fyrst hafi stigið í ræðustól Erla Björk Örnólfsdóttir rektor, en síðan ávarpaði ráðherra ferðamála, Þórdís Kolbrún R. Gylfadóttir, viðstadda. Deildarstjórar skólans sögðu einnig nokkur orð áður en þeir brautskráðu sína nemendur og veittu auk þess nokkrar viðurkenningar fyrir framúrskarandi árangur í námi.

Nú er Leikhópurinn Lotta á ferðalagi um landið með sýningu sína, Ljóta andarungann. Í dag kl 18:00 verður sýning í Litla skógi á Sauðárkróki og á laugardaginn, 1. júlí kl. 11:00 verður sýnt á Káratúni á Blönduósi.

Á fundi byggðarráðs Húnaþings vestra sl. mánudag var lagt fram bréf frá Jónínu Helgu Jónsdóttur og Þorbjörgu Ingu Ásbjarnardóttur, vegna ástands vegarins um Vatnsnes. Bréfið var sent íbúum og helstu hagsmunaaðilum á svæðinu og þeir hvattir til að senda inn kvörtun til Vegagerðarinnar. Á vef sveitarfélagsins segir að einnig hafi borist bréf frá Heimi Ágústssyni, Þóru Þormóðsdóttur, Þormóði Heimissyni og Kristbjörgu S. Birgisdóttur um sama mál.