Fréttir

Sveitarfélagið Skagafjörður hlaut árið 2015 styrk frá Minjastofnun Íslands til að vinna tillögur um verndarsvæði í byggð á Sauðárkróki og á Hofsósi en markmiðið með slíkum svæðum er að stuðla að vernd og varðveislu byggðar sem hefur sögulegt gildi. Verkefnið skiptist í húsakönnun, fornleifaskráningu og greinargerð þar sem metið er varðveislugildi og gerðir skilmálar um vernd og uppbyggingu innan svæðisins.

Þau skemmtilegu, og ekki síst merkilegu tímamót eru skráð á spjöld sögunnar í Feyki vikunnar þar sem sjöhundraðasti vísnaþátturinn lítur dagsins ljós. Fyrsti þátturinn birtist í Feyki 1. apríl 1987 og fögnuðum við því 30 ára úthaldi sl. vor.

Dagur íslenskrar tungu hefur verið haldinn hátíðlegur á fæðingardegi Jónasar Hallgrímssonar, þann 16. nóvember, frá árinu 1996. Þennan dag er ýmislegt gert til þess að hefja móðurmálið til vegs og virðingar, viðurkenningar veittar, margir skólar halda sérstaka dagskrá í tilefni dagsins og þessi dagur er formlegur upphafsdagur Stóru upplestrarkeppninnar í 7. bekkjum landsins.

Hrossaræktarsamband Skagafjarðar og Hestamannafélagið Skagfirðingur héldu sameiginlega uppskeruhátíð í Ljósheimum laugardagskvöldið 11. nóvember sl. Veitt voru verðlaun í öllum flokkum kynbótahrossa. Þórarinn Eymundsson var sigursæll og handlék nokkra bikarana.

Öllum grunnskólanemum í 8. til 10. bekkjum á Norðurlandi vestra var boðið að sækja starfakynningu sem hófst í morgun í Bóknámshúsi FNV en þar kynna um 30 fyrirtæki af svæðinu starfsemi sína og þau störf sem innt eru af hendi hjá þeim. Verkefnið beinir kastljósinu sérstaka á iðn-, raun- og tæknigreinar og er styrkt af Sóknaráætlun Norðurlands vestra.

Í kvöld, miðvikudaginn 15. nóvember kl. 20:00 verður Héraðsbókasafn Skagfirðinga á Sauðárkróki með opið hús þar sem fjórir rithöfundar munu lesa úr nýútkomnum verkum sínum.

Í fjórða þætti Atvinnupúlsins í Skagafirði, sem frumsýndur er á N4 í kvöld, er m.a. rætt við Tryggva Þór Haraldsson forstjóra RAKIK. Hann segir að allt að einum og hálfum milljarði króna verði varið í verkefni í Skagafirði næstu misserin.

Hefur þér dottið þetta í hug?

Í Morgunblaðinu í dag er sagt frá því að verkefnið Norðurstrandarleið eða Arctic Coast Way sé nú komið á góðan rekspöl. Verkefnið hefur það að markmiði að laða ferðamenn að strandlengjunni meðfram Norðurlandi, allt frá Húnaflóa til Bakkafjarðar, árið um kring, og hvetja þá til að staldra lengur við á svæðinu. Eins og Feykir.is hefur áður greint frá hefur Markaðsstofa Norðurlands umsjón með verkefninu með þátttöku 17 sveitarfélaga og ýmissa ferðaþjónustuaðila á svæðinu.

Drög að starfsleyfi fyrir Skotfélagið Markviss vegna starfrækslu skotvallar á Blönduósi eru nú til kynningar hjá Blönduósbæ. Þeir sem telja sig málið varða eru hvattir til að kynna sér þær og gera athugasemdir ef þurfa þykir.