Fréttir

Handbendi er leikfélag sem framleiðir brúðuleikhússýningar, auk hefðbundins leikhúss, og hefur bækistöðvar sínar á Hvammstanga. Leikhúsið mun framleiða nýjar sýningar, ætlaðar til leikferða um Ísland og heim allan; mun halda vinnusmiðjur og fyrirlestra sem virtir sérfræðingar á sviði brúðuleikhúss munu leiða; og vinna með skólum og kennurum á Norðurlandi vestra.

Uppi eru hugmyndir um byggingu 120 þúsund tonna álvers við Hafurstaði í Skagabyggð í samvinnu við kínverska aðila. Hafa sex sveitarfélög á Norðurlandi vestra undirritað viljayfirlýsingu um byggingu álversins í samvinnu við kínverskt fyrirtæki, NFC, sem hyggst fjármagna álverið að stórum hluta. Hefur ríkisstjórnin veitt 30 milljónum af fjárlögum þessa árs til undirbúnings verkefninu.

-Það er lykillinn að öllu að Costa haldi áfram með liðið, sagði Stefán Jónsson formaður körfuknattleiksdeildar Tindastóls við Feyki í kvöld en Stólarnir hafa komist að samkomulagi við spænska þjálfarann, Jou Costa, um að hann haldi áfram að þjálfa Tindastól næsta tímabil.

Búnaðarsamband Eyjafjarðar (BSE) veitir árlega viðurkenningu fyrir sérstakt framtak tengt landbúnaði og/eða úrvinnslu landbúnaðarafurða. Viðurkenningin getur verið fyrir vel unnin störf, athyglisverða nýjung eða einstakan árangur. Á aðalfundi félagsins í vikunni voru þessi verðlaun veitt sjónvarpsstöðinni N4 á Akureyri.

Landsmót hestamanna og RÚV hafa gert með sér samning um samstarf á Landsmótinu á Hólum sem hefst 27. júní nk. Samningurinn gerir ráð fyrir að RÚV muni sýna beint frá stærstu keppnisgreinum Landsmóts á föstudegi og laugardegi auk þess að búa til samantektarþætti frá mótinu. Greint er frá þessu á landsmot.is.

Í Morgunblaðinu í dag segir frá frækilegu björgunarafreki nokkurra unglinga á Skagaströnd er þeir björguðu lífi eldri konu er hún fékk hjartaáfall í göngutúr utan alfaraleiðar. Einn drengur í hópnum hóf hjartahnoð strax og hann áttaði sig á alvarleika málsins og hnoðaði í 17 mínútur þangað til sjúkrabíll kom á staðinn. „Með skjótum og réttum viðbrögðum tókst krökkunum í sameiningu að bjarga lífi konunnar,“ segir í fréttinni.

Sundlaugin á Hofsósi verður lokuð vegna viðhalds á morgun, fimmtudaginn 14. apríl.

Ársfundur Byggðastofnunar verður haldinn föstudaginn 15. apríl 2016 í Miðgarði í Skagafirði. Á ársfundinum er fjölbreytt dagskrá og þar verður meðan annars veitt hin árlega viðurkenning Landstólpinn.

Stóra upplestrarkeppnin var haldin í sal bóknámshúss FNV í gær og þar öttu kappi tólf nemendur úr öllum grunnskólunum Skagafjarðar og lásu textabút úr sögu og tvö ljóð. Nemendurnir stóðu sig með stakri prýði og báru þess glöggt vitni að hafa æft sig af kappi og fengið góða þjálfun hjá kennurum sínum. Nemendur Tónlistarskóla Skagafjarðar léku svo nokkur lög fyrir gesti hátíðarinnar.

Að þessu sinni er það Svavar Sigurðsson mjólkurfræðingur hjá Mjólkursamlagi KS sem svarar Tón-lystinni. Svabbi er fæddur 1969, sonur Helenu Svavarsdóttur og Reynis Barðdal, fæddur og uppalinn á Sauðárkróki og segist heimakær með afbrigðum. Verkfæri Svabba í tónlistinni er gítar og spurður um helst tónlistarafrek svarar hann: „Hljómsveitin Herramenn á sínum tíma, það var nú alveg nægilegt fyrir mig.“