Fréttir

Íbúar og velunnarar Hóla í Hjaltadal og Háskólans á Hólum komu saman til fundar þann 11. mars síðastliðinn. Í yfirlýsingu lýsa fundarmenn yfir miklum áhyggjum af áformum stjórnvalda sem meðal annars koma fram í minnisblaði framkvæmdahóps um Hóla í Hjaltadal dagsett 15. október 2025. Minnisblaðið hefur verið rætt í ríkisstjórn. Í yfirlýsingunni kemur fram að þær tillögur sem nú liggja fyrir hafa verið unnar án nokkurs samráðs við íbúa, almenna starfsmenn háskólans og aðra velunnara.

Mikið óveður gekk yfir Norðurland vestra í gær og fram eftir nóttu með þeim afleiðingum að þjóðvegir lokuðust, hundruð ferðamanna urðu strandaglópar og fjöldahjálparstöðvar voru opnaðar til að hýsa fólk sem komst hvorki lönd né strönd. Þrátt fyrir erfiðar aðstæður og mikla umferð um svæðið urðu engin slys á fólki.

N-listinn, Nýtt afl í Húnaþingi vestra hefur kynnt framboðslista sinn fyrir sveitarstjórnarkosningarnar í maí. Nýr oddviti N-listans er Viktor Ingi Jónsson sem áður skipaði fjórða sætið en Magnús Vignir Eðvalldsson, sem áður var oddviti, færir sig niður í annað sæti.

Það styttist óðum í sveitarstjórnarkosningar en nú eru tveir mánuðir þar til kosið verður. Miðflokksdeild Skagafjarðar hefur áður sagt frá því hverjir munu skipa efstu tvö sæti Miðflokksins í Skagafirði og nú hefur Feyki borist listu flokksins til sveitarstjórnarkosninga árið 2026.

Vonskuveður hefur verið víða á Norðurlandi vestra í dag og í kvöld og þjóðvegur 1 er til að mynda lokaður á kaflanum frá Blönduósi og alla leið suður í Borgarfjörð sem stendur. Í frétt á mbl.is segir að Rauði krossinn hafi opnað tvær fjöldahjálparstöðvar. Önnur er í Íþróttamiðstöðinni á Blönduósi og hin í Reykjaskjóla í Hrútafirði.

Við minnum á málþingið á Hólum nú á þriðjudaginn sem ber titilinn Viðburðir sem auðlind. Nemendur í Viðburðastjórnun við Háskólann á Hólum standa fyrir málþingi 17. mars kl. 13:00-16:00. Á málþinginu verður fjallað um mikilvægt og sívaxandi hlutverk viðburða í samfélagi og atvinnulífi.

Lið Tindastóls heimsótti lið ÍA á Akranesið í gærkvöldi en þetta var lokaleikurinn í 20. umferð Bónus deildar karla. Leikurinn var fjörugur en sigur var báðum liðum mikilvægur, Stólunum í baráttunni um gott sæti í úrslitakeppninni en Skagamenn eru að reyna að bjarga sér frá falli í 1. deild. Það mátti því búast við Skagamönnum baráttuglöðum og einbeittum en það má þó segja að þannig voru Skagamenn aðeins stilltir í um fimm mínútur í fyrsta leikhluta. Það dugði auðvitað skammt því Badmus og Basile voru í steiktu stuði fyrir Stólana sem unnu þægilegan sigur. Lokatölur 86-115.

Lið Kormáks/Hvatar og Tindastóls léku í Lengjubikarnum í gær og hvorugt liðið nældi í stig. Tindastólsmenn léku við lið Hattar á Egilsstöðum og máttu sætta sig við 2-1 tap en Húnvetningar fengu skell í Grafarvoginum þar sem heimamenn í Fjölni skoruðu tíu sinnum án þess að lið Kormáks/Hvatar næði að koma inn höggi.

Þriðja keppnisgrein í Meistaradeild KS í hestaíþróttum fór fram sl. föstudagskvöld í Svaðastaðahöllinni á Sauðárkróki. Í frétt á Facebook-síðu Meistaradeildarinnar segir að mörg góð, ung og upprennandi hross voru skráð til leiks ásamt örfáum reynsluboltum. Hofstorfan/550 var stigahæsta lið kvöldsins en leikar fóru þannig að Þórarinn Eymundsson (Hrímnir/Hestaklettur) bar sigur úr býtum en hann keppti á hinum þrautreynda Þráni frá Flagbjarnarholti.

Það stytti loksins upp í gærkvöldi og veðrið hefur verið með ágætum á Norðurlandi vestra í dag. Það er hins vegar gul viðvörun á svæðinu frá því snemma í fyrramálið og fram á kvöld og hefur Lögreglan á Norðurlandi vestra einmitt vakið athygli á slæmri veðurspá. Spáð er norðaustan 13-20 m/sek og skafrenningi eða snjókomu á köflum.