Skagafjörður

Birgðir af kindakjöti síðasta árs þann 1. september 2017 voru 1.063 tonn, eftir því sem fram kemur í tilkynningu frá Landsambandi sauðfjárbænda. Á sama tíma í fyrra voru brigðirnar 1.262 tonn. Birgðir við upphaf sláturtíðar eru því 16,6% minni á en í fyrra. Frá þessum birgðum munu dragast 500 til 600 tonn áður en nýtt kjöt kemur að fullu á markað en sala á innanlandsmarkaði er um 560 tonn á mánuði að meðaltali. Umframbirgðir af kjöti frá sláturtíðinni haustið 2016 verða því um 500 tonn þegar upp er staðið eða rétt tæplega eins mánaðar sala. Þessar birgðir eru um 5% af heildarframleiðslunni sem eru um 10 þúsund tonn.

Á Sveitasælu, sem haldnir voru í ágúst, stóð Kiwanisklúbburinn Freyja fyrir söfnun til styrktar Jökli Mána, sem fæddist sjö vikum fyrir settan tíma, þann 14. júlí síðastliðinn. Hann fæddist með hjartagalla og þarf því að fara til Lund í Svíþjóð í aðgerð en hjartagallar fylgja gjarnan Downs-litningargöllum líkt og hjá Jökli. Á dögunum afhenti klúbburinn foreldrunum, Önnu Baldvinu Vagnsdóttur og Nökkva Má Víðissyni, afrakstur söfnunarinnar, samtals 448.493 krónur.

Tindastóll sótti heim lið Knattspyrnufélags Vesturbæjar í dag og var leikið á KR-vellinum. Liðsmenn KV voru í næstneðsta sæti 2. deildar fyrir leikinn og þurfti nauðsynlega á sigri að halda til að laga stöðu sína í deildinni. Með sigri gátu Stólarnir aftur á móti tryggt veru sína í deildinni og sú varð raunin. Bjarki Már gerði sigurmarkið í uppbótartíma en lokatölur voru 1-2 fyrir Tindastól.

Þessa dagana sýnir Króksarinn Jóhannes Atli Hinriksson í sýningarsal Kling & Bang Marshallhúsinu við Grandagarð í Reykjavík fyrir sunnan. Jói er sprenglærður listamaður með próf frá School of Visual Arts í Nýju Jórvíkur-hreppi. Sýningin ber hið hið ágæta nafn, OK, api Allt í lagi og opnaði þann 26. ágúst síðastliðinn.

Þrátt fyrir að íslensku landsliðin í fót- og körfubolta hafi ekki sótt sigra í Finnlandi þegar Evrópumót körfuboltaliða og landsleikur við Finna í undankeppni HM í fótbolta fóru fram á dögunum, voru liðin dyggilega studd af íslenskum stuðningsmönnum. Fjöldi Skagfirðinga, bæði búsettir sem brottfluttir, mætti til Finnlands og reyndi blaðamaður að fanga sem flesta á mynd. Margir sluppu þó við myndatöku. Afraksturinn er hægt að sjá hér fyrir neðan.

Síðastliðinn fimmtudag var haldinn fundur í velferðarnefnd Alþingis að ósk Steinunnar Þóru Árnadóttur, þingmanns VG, þar sem málefni Háholts í Skagafirði voru tekin til umræðu. Á fundinn mættu fulltrúar Barnaverndarstofu sem fóru yfir hlutverk stofnunarinnar og þau úrræði sem standi til boða, sem og Þorsteinn Víglundsson, velferðarráðherra.

Skólar landsins hafa nú opnað dyr sínar að nýju eftir sumarhlé. Umræða um skóla- og menntamál er því mikil um þessar mundir og það er eðlilegt því þetta er málefni sem snertir okkur öll, hvar sem við búum á landinu. Rætt er um gildi skólastarfsins, lengd og fyrirkomulag, innihald og gæði menntunar og ófullnægjandi kjör kennara, kostnað nemenda og líðan þeirra í skólanum svo fátt eitt sé nefnt. Námslán, námsaðstoð og viðmót gagnvart námi er einn angi umræðunnar.

„Hér er smá uppskrift sem er fljótlegt að gera og er alveg rosalega góð. Svakalega holl og matarmikil. Fundum hana upprunalega á eldhússögur.is og eldum hana reglulega. Okkur finnst líka alveg frábært hvað það þarf lítið að vaska upp, það bara fer allt í sama pottinn,“ segja matgæðingar vikunnar, í 35. tölublaði Feykis árið 2015, Karítas Sigurbjörg Björnsdóttir og Sigurður Arnar Björnsson á Sauðárkróki.

Bókasafnsdagurinn er haldinn hátíðlegur í dag, þann 8. september, á alþjóðlegum degi læsis. Það var árið 1965 sem Sameinuðu þjóðirnar gerðu daginn að aðþjóðadegi læsis og þennan dag er fólk um allan heim hvatt til að lesa upp, segja sögur, fara með ljóð eða nota tungumálið á einhvern annan hátt til ánægjulegra samskipta.

Leikfélag Akureyrar æfir nú í Samkomuhúsinu sýninguna Kvenfólk eftir Hund í óskilum. Í sýningunni fara þeir félagar í Hjörleifur Hjartarsson og Eiríkur Stephensen á hundavaði yfir kvennasöguna undir leikstjórn Ágústu Skúladóttur. Sýningin verður frumsýnd þann 29. september og sýnd í október og nóvember í Samkomuhúsinu.