Fréttir

Eitthvað virðist það ætla að dragast að hríðarveðrið gangi niður í dag og í raun má segja að úrkoma og hvassvirðri hafi nú verið í boði í tvo daga og sá þriðji sé runninn upp. Langvarandi leiðindum í veðrinu fylgir ófærð og léleg akstursskilyrði. Holtavörðuheiðinni var lokað í gærkvöldi vegna óveðurs og mun Vegagerðin bíða til klukkan tíu með að taka ákvörðun um hvort heiðin verði opnuð en bílar sitja fastir á heiðinni.

Davíð Oddsson, ritstjóri Morgunblaðsins og fyrrverandi borgarstjóri, forsætisráðherra og seðlabankastjóri, sem lést hinn 1. mars, verður til grafar borinn í dag. Útförin verður gerð frá Hallgrímskirkju kl. 13 og er öllum opin, en athöfnin verður einnig í beinni útsendingu á mbl.is og Ríkissjónvarpinu.

Morgunblaðið segir frá því í dag að Landsvirkjun hafi lengi haft áform um að auka raforkuframleiðslu á svæði Blönduvirkjunar en Feykir sagði frá því í byrjun árs 2013 að áform væru um þrjár virkjanir við Blöndu. Í frétt Moggans segir að vegna þess hve veikt flutningskerfi raforku er hafi verið vandkvæðum bundið að koma raforkunni frá svæðinu en nú ku hilla undir betri tíma í þeim efnum.

Á Facebook-síðu Lögreglunnar á Norðurlandi vestra er athygli beint að því að lögreglunni berist ábendingar þessa dagana um svikasímtöl, sem berast úr íslenskum númerum en þegar svarað er, er hinu megin á línunni enskumælandi aðili, sem segist vilja aðstoða viðkomandi með heimilistölvuna.

Kaupfélag Skagfirðinga hefur um árabil stutt myndarlega við Landmót hestamanna, ekki síst þau sem haldin hafa verið hér í Skagafirði. Á því verður engin breyting á komandi sumri þegar Landsmót fer fram á Hólum í Hjaltadal, en þar verður KS meðal annars með myndarlegan bás á markaðssvæði mótsins.

Samtök sveitarfélaga á Norðurlandi vestra (SSNV) og Samtök sveitarfélaga á Vesturlandi (SSV) hafa látið vinna samantekt um línustæði raflína, eignarrétt og endurgjald til landeigenda. Í frétt á vef SSNV segir að markmið skýrslunnar sé að varpa ljósi á hvernig bætur fyrir lagningu raflína eru ákvarðaðar hér á landi og bera það saman við fyrirkomulag í nágrannalöndum Íslands. Skýrslan, sem var unnin af Torfa Jóhannessyn frá Torfalæk, er liður í því að efla umræðu um réttindi landeigenda, hagsmuni sveitarfélaga og uppbyggingu orkuflutningskerfisins í framtíðinni.

Húnahornið tekur upp frétt Bændablaðsins þar sem fjallað er um skýrsluhald sauðfjárræktarinnar og fara tveir ráðunautar Ráðgjafarmiðstöðvar landbúnaðarins, Árni B. Bragason og Eyþór Einarsson, yfir það helsta sem þar ber á góma. Í yfirliti þeirra kemur m.a. fram að framleiðsluárið 2025 hafi verið ákaflega hagstætt að mörgu leyti. Meðalafurðir eftir hverja á voru 28,98 kíló, sem er aðeins meira en árið á undan, en aðeins minna en árið 2021, þegar þær voru 29,46 kíló, en það var metár.

Tindastólsmenn fengu lið Riga Zelli í heimsókn í Síkið í gærkvöldi í 16 liða úrslitum ENBL-deildarinnar. Reiknað var með hörkuleik og það var það sem sannarlega var boðið upp á en því miður þá reyndust gestirnir sterkari, Stólarnir lentu í að elta og gestirnir voru full drjúgir utan 3ja stiga línunnar. Þeir héldu út og sigruðu 94-101 og Stólarnir því úr leik í Evrópudeildinni og sá pakki ekki skoðaður frekar á þessu tímabili.

Það er hálfgert leiðindaveður á Norðurlandi vestra sem stendur; gæti svosem verið verra en gæti líka sannarlega verið betra. Reikna má með að veðrið verði svipað í mestallan dag; norðan og norðvestan strekkingur að mestu en lægir örlítið af og til. Þessi fylgir ýmist snjókoma eða lítils háttar snjókoma. Nokkuð hefur snjóað frá í gær og er snjór á flestum vegum.

Út er komin bókin Í framlínu – lögreglumenn segja frá og er hún þegar komin í helstu bókaverslanir. Höfundur er Júlíus Ó. Einarsson þjóðfræðingur, sem jafnframt er fyrrverandi lögreglumaður. Í bókinni lýsa tugir lögreglumanna starfi sínu, einstökum verkefnum og upplifunum á meira en 250 blaðsíðum. Einnig eru þar hugleiðingar um eðli lögreglustarfins og áhrif þess á þá sem því sinna og þeirra nánustu.