A-Húnavatnssýsla

Farskólinn, miðstöð símenntunar á Norðurlandi vestra, býður á næstu dögum íbúum Norðurlands vestra upp á fimm gerðir fjarnámskeiða. Er það gert í samstarfi við Samtök sveitarfélaga á Norðurlandi vestra og stéttarfélögin Ölduna, Verslunarmannafélag Skagafjarðar, Sameyki, Samstöðu og Kjöl.

Þrátt fyrir alvarleika COVID-19 veirunnar hefur þríeykið í aðgerðarteymi Landlæknisembættisins hvatt fólk til að halda áfram að lifa lífinu og hafa gaman. Margir hafa sett á Facebook síður sínar eða á YouTube, hinar ágætustu vídeósketsa í viðleitni sinni til að gleðja fólk. Hér er einn sprenghlægilegur um íslenska sóldýrkendur og langþreytta Púllara.

Afgreiðslum Lögreglunnar á Norðurlandi vestra hefur verið lokað tímabundið en það er liður í auknum smitvörnum vegna Covid-19 faraldursins. Hægt er að hafa samband í síma 444-0700 ef ná þarf sambandi við skrifstofu lögreglunnar á Norðurlandi vestra, milli klukkan 9 og 15 alla virka daga, eða í gegnum netfangið nordurland.vestra@logreglan.is. Ef ná þarf sambandi við lögreglu á að hafa samband við 1-1-2

Mennta- og menningarmálaráðuneyti mun verja viðbótar 750 milljónum kr. í menningarverkefni og stuðning við starfsemi íþróttafélaga á næstu vikum, til að sporna við efnahagsáhrifum COVID-19 faraldursins. Þá verður 400 milljónum kr. varið í rannsóknartengd verkefni. Alls er því um ræða 1.150 milljónir kr., sem koma til viðbótar við fjárveitingar í fjárlögum ársins 2020.

„Eins og allir vita geta hlutirnir breyst hratt á þessum skrítnu tímum. Upp er kominn grunur um Covid-19 smit í Höfðaskóla og því hefur verið tekin ákvörðun um að færa kennslu alfarið yfir í fjarkennslu frá og með morgundeginum 25. mars. Mun það fyrirkomulag vara á meðan beðið er eftir niðurstöðum úr sýnatöku,“ segir á heimasíðu Höfðaskóla á Skagaströnd.

Atvinnuráðgjafar Samtaka sveitarfélaga á Norðurlandi vestra bjóða fram þjónustu sína fyrir atvinnurekendur í landshlutanum. Í tilkynningu á vef samtakanna segir að margir atvinnurekendur standi nú frammi fyrir óvissu með rekstur sinn og óvíst um framkvæmd þeirra úrræða sem kynnt hafa verið og hvað þau þýði fyrir fyrirtæki og einstaklinga. Atvinnuráðgjafar munu fylgjast grannt með og miðla upplýsingum til fyrirtækja í landshlutanum.

Vegna herts samkomubanns og til að sporna gegn útbreiðslu Covid-19 geta viðskiptavinir Landsbankans aðeins fengið afgreiðslu í útibúi ef erindið er mjög brýnt og ekki er hægt að leysa úr því með öðrum hætti, þ.e. í sjálfsafgreiðslu eða með samtali við Þjónustuver. Til að fá afgreiðslu er nauðsynlegt að panta tíma fyrirfram en breytingarnar taka gildi frá og með deginum í dag, þriðjudagsins 24. mars 2020, og gilda þar til samkomubanni stjórnvalda verður aflétt.

Í framhaldi af hertum reglum um samkomubann vegna COVID-19 verður öllum sundlaugum, íþróttahúsum og líkamsræktarstöðvum lokað meðan bannið stendur. Lokunin hefur þegar tekið gildi í sundlaugum og íþróttahúsum á Norðurlandi vestra.

Heilbrigðisráðherra hefur ákveðið, í samræmi við tillögu sóttvarnalæknis, að takmarka samkomur enn frekar en áður vegna hraðari útbreiðslu Covid-19 í samfélaginu. Viðburðir þar sem fólk kemur saman verða takmarkaðir við 20 manns í stað 100 áður. Við öll mannamót þarf auk þess að tryggja að nánd milli manna verði yfir tveimur metrum. Ákvörðunin tekur gildi á miðnætti í kvöld (þ.e. aðfaranótt þriðjudags). Takmörkun á skólahaldi verður óbreytt.

Frá áramótum hefur verið unnið að áherslubreytingum á skrifstofu og þjónustumiðstöð Blönduósbæjar. Breytingarnar ná yfir verkaskiptingu, starfsheiti og ábyrgð lykilstarfsmanna eftir þær starfamannabreytingar sem gerðar hafa verið. Tilkynnt er um breytingarnar á vef Blönduósbæjar en þær hafa þegar tekið gildi.