Fréttir

Það eru bikarleikir framundan í Síkinu. Í kvöld mætir karlalið Tindastóls kempum af Álftanesi sem leika undir stjórn hins þaulreynda þjálfara Hrafns Kristjánssonar. Lið Álftaness er um miðja 1. deild með átta stig eftir níu leiki. Kvennalið Tindastóls fær hins vegar úrvalsdeildarlið Hauka í heimsókn á laugardaginn og hefst leikurinn kl. 14. Feykir hafði samband við Árna Eggert, þjálfara Tindastóls, og spurði hann út í leikinn.

Rótarýfélagar héldu uppteknum hætti og nú á laugardaginn var Skagfirðingum og nærsveitungum enn eina ferðina boðið upp á glæsilegt jólahlaðborð í íþróttahúsinu á Króknum. Sjaldan eða aldrei hefur fjöldi gesta verið meiri og nokkuð ljóst að hlaðborðið góða er að verða að föstum lið hjá mörgum í upphafi aðventunnar.

Það er óhætt að segja að þau samfélög eru rík sem njóta góðvildar hinna ýmsu klúbba sem hafa svo oft lagt mörgum góðum málefnum lið. Svo er um Skagafjörð en frá Kiwanisklúbbnum Drangey á Sauðárkróki hafa margvíslegar gjafir ratað til einstaklinga og stofnana og má í því sambandi m.a. benda á hjálma til grunnskólabarna, hin ýmsu tæki á sjúkrahúsið og sitthvað til kirkjunnar svo eitthvað sé nefnt.

Líkt og undanfarin ár leitar Feykir til lesenda með tilnefningar um mann ársins á Norðurlandi vestra. Ólöf Ólafsdóttir á Tannstaðabakka var kjörin maður ársins fyrir árið 2018 en nú er komið að því að finna verðugan aðila til að taka við nafnbótinni Maður ársins á Norðurlandi vestra 2019.

Jólahúnar munu halda sína árlegu tónleika um helgina en í ár verða tvennir tónleikar í Ásbyrgi á Laugarbakka á föstudaginn, Félagsheimilinu á Blönduósi daginn eftir og í Fellsborg á Skagaströnd sunnudaginn 8. des. Að sögn Skúla Einarssonar á Tannstaðabakka hefur undirbúningur gengið vel.

Út er komin hjá bókaforlaginu Espólín bókin Uppskriftir stríðsáranna sem er forvitnileg uppskriftabók þar sem leitað er í handskrifaðar matreiðslubækur systranna Sigurlaugar (f. 1924) og Guðbjargar (f. 1919, d. 2013) Sveinsdætra frá Tjörn á Skaga sem stunduðu báðar nám við Kvennaskólann á Blönduósi á stríðsárunum. Höfundar eru Anna Dóra Antonsdóttir sem er dóttir Sigurlaugar, og Kristrún Guðmundsdóttir.

Vel var mætt á síðustu opnu íbúafundi Sveitarfélagsins Skagafjarðar í fimm funda herferð sem fram fóru á veitingastaðnum Undir Byrðunni á Hólum, Höfðaborg Hofsósi og í Ketilási í Fljótum í síðustu viku. Almenn ánægja var meðal fundargesta með framtak sveitarfélagsins og sköpuðust góðar og gagnlegar umræður um málefni sem snerta alla.

Annað kvöld, fimmtudaginn 5. desember, heldur Einar Ó. Þorleifsson, náttúrufræðingur hjá Náttúrustofu Norðurlands vestra, fyrirlestur sem nefnist Fuglarnir í garðinum og er hluti af fyrirlestraröð Náttúrustofu Norðurlands vestra. Hann verður fluttur í húsnæði Náttúrustofu að Aðalgötu 2 á Sauðárkróki.

Ferðaþjónustuaðilar í Eyjafirði ætla að opna dyrnar upp á gátt sunnudaginn 7. des og verða með allskonar tilboð og skemmtilegheit fyrir gesti og gangandi fyrir jólin. Króksarinn Sesselja Barðdal er framkvæmdastjóri og eigandi vöfflu- og afþreyingarkaffihússins Kaffi Kú og einn hvatarmaður verkefnisins. Feykir sendi Sesselju spurningar og forvitnaðist um þennan tiltekna viðburð og kaffihúsareksturinn í sveitinni.

Opnað hefur verið fyrir umsóknir fyrir Eyrarrósina 2020 en Eyrarrósin er viðurkenning sem veitt er framúrskarandi menningarverkefnum, utan höfuðborgarsvæðisins, sem þegar hafa fest sig í sessi. Markmið Eyrarrósarinnar er að beina sjónum að og hvetja til menningarlegrar fjölbreytni, nýsköpunar og uppbyggingar á sviði menningar og lista. Byggðastofnun, Air Iceland Connect og Listahátíð í Reykjavík hafa staðið saman að verðlaununum frá upphafi, eða frá árinu 2005.