Fréttir

Í dag 8. október fagnar Miðflokkurinn því að eitt ár er liðið frá frá stofnun flokksins. Stofnfundurinn var haldinn í Rúgbrauðsgerðinni í Reykjavík fyrir troðfullu húsi sunnudaginn 8. október 2017.

Kveður í runni, kvakar í mó kvikur þrastasöngur. Eins mig fýsir alltaf þó aftur að fara í göngur.

Leikfélag Sauðárkróks frumsýnir á sunnudaginn kemur leikritið Ævintýrabókina eftir Pétur Eggerz með tónlist eftir Guðna Franzson. Leikstjóri verksins er Ingrid Jónsdóttir og alls eru 28 hlutverk í sýningunni sem leikin eru af 25 leikurum.

Tvíburasystkinin Ester María Eiríksdóttir og Jón Örn Eiríksson frá Hofsósi, fengu í gær styrk úr Hvatningarsjóði Kviku, hvort um sig upp eina milljón króna. Hvatningarsjóðurinn, sem er samstarfsverkefni Kviku og Samtaka iðnaðarins, hefur það að markmiði að efla umræðu og vitund um mikilvægi iðn- og starfsnáms og þýðingu starfa sem því tengjast fyrir íslenskt atvinnulíf að því er segir á vef Kviku. Styrktarfjárhæð sjóðsins er fimm milljónir króna á ári í þrjú ár.

„Við erum hjónin Pétur Hafsteinn Sigurvaldason frá Litlu-Ásgeirsá í Víðidal og Bjarney Alda Benediktsdóttir frá Neðri-Torfustöðum í Miðfirði. Við búum að Neðri-Torfustöðum ásamt börnum okkar. Þau eru Ármann, Kristrún og María. Bústofninn á bænum er blandaður; kýr, kindur og nokkur hross. Ekki má gleyma að nefna tíkina okkar Millu, örustu hjálparhellu norðan Alpafjalla," sögðu hjónin Pétur og Bjarney, sem voru matgæðingar vikunnar í 29. tbl. Feykis árið 2013.

Hún kom mér svo á óvart öflug gleðitilfinningin sem hríslaðist um mig augnablikið þegar Skagafjörðurinn birtist mér er ég ók niður af Vatnsskarðinu. Það var daginn sem ég flutti aftur norður. Ég gat nánast ekki hreyft mig í bílnum því agnarsmá Nissan Micra-bifreiðin sem ég ók var úttroðin af hreytunum úr íbúðinni sem við bjuggum í fyrir sunnan, svo troðin að börnin fóru í hinum bílnum og ég fékk að keyra ein með Rás eitt á fullu gasi.

Stóðréttir verða í Víðidalstungurétt á morgun, laugardaginn 6. október, en fjörið sem réttunum fylgir hefst í dag. Á Facebooksíðunni Stóðréttir Víðidalstungurétt segir að stóðinu verði hleypt í gegnum hliðið við Bergárbrú í fyrsta lagi kl. 14:00. Hægt verður að kaupa sér hressingu í skemmunni á Kolugili milli kl. 14:00 og 17:00 og frá kl. 17:00 fæst kjötsúpa í réttarskúr kvenfélagsins Freyju við Víðidalstungurétt.

Sundlaugarnar í Varmahlíð og á Sauðárkróki eru nú báðar lokaðar tímabundið. Í gær var Sundlauginni á Sauðárkróki lokað vegna framkvæmda og verður svo um einhvern tíma. Sundlaugin í Varmahlíð verður opnuð á mánudaginn kemur, 8. október, eftir tímabundna lokun. Þá verða bæði litla og stóra laugin opnar, svo og potturinn. Nýja rennibrautin er enn ekki klár, eða eins og segir á Facebooksíðu sundlaugarinnar – góðir hlutir gerast hægt.

Á fundi byggðarráðs Skagafjarðar þann 20. september sl. var tekið fyrir bréf frá Íbúðalánasjóði þar sem fram kemur að sjóðurinn leiti eftir tveimur til fjórum sveitarfélögum til að taka þátt í tilraunaverkefni um uppbyggingu í húsnæðismálum á landsbyggðinni. Byggðarráð samþykkti að fela sveitarstjóra að sækja um að Sveitarfélagið Skagafjörður verði þátttakandi.

Dominos-deildin í körfuknattleik hófst í kvöld og lið Tindastóls fékk Þór Þorlákshöfn í heimsókn en liðunum er spáð misjöfnu gengi í vetur. Stólarnir náðu frábærum kafla í fyrri hálfleik þar sem þeir bjuggu til heilbrigt forskot og það náðu gestirnir aldrei að brúa þó svo að þeir næðu að vinna sig inn í leikinn á ný. Lokatölur 85-68 í leik þar sem Urald King og Dino Butorac voru atkvæðamestir í liði Tindastóls.