Fréttir

Nú í nóvemberbyrjun lítur dagsins ljós afrakstur samstarfs afmælisnefndar fullveldis Íslands og Mjólkursamsölunnar þegar sérstakar fullveldisfernur koma í búðir. Fernurnar prýða sex mismunandi textar og myndskreytingar um markverða atburði sem áttu sér stað á árinu 1918. Fróðleiksmolarnir um fullveldisárið verða á mjólkurfernunum út afmælisárið og eru bundnar miklar vonir við að landsmenn taki fernunum fagnandi og verði einhvers vísari um þetta merkisár í Íslandssögunni.

„Við höfum nú nokkuð oft verið á ferðalagi hingað og þangað um heiminn tengt okkar vinnu. Á þessu flakki kynnist maður margvíslegri matargerð sem gaman er að blanda saman við okkar hefðbundnu, íslensku matargerð. Við ætlum að bjóða ykkur uppá hörpuskel með japönsku ívafi í forrétt, lambakjöt í aðalrétt og franska súkkulaðiköku á eftir,“ sögðu þau Gunnsteinn Björnsson og Sigríður Káradóttir, sem buðu lesendum Feykis upp á spennandi uppskriftir í 42. tbl. Feykis árið 2016.

Unnur fráfarandi oddviti Húnaþings skoraði á mig að skrifa eitthvað í Feyki og ég skorast ekki undan því frekar en öðru sem ég er beðinn um að gera. Ég er fæddur og uppalinn á Hvammstanga og flutti aftur heim fyrir 14 árum eftir námsdvöl á Suðurlandinu.

Það var hart barist þegar KR og Tindastóll mættust í DHL-höllinni í kvöld. Stólarnir voru eina taplausa liðið í Dominos-deildinni en Íslandsmeistararnir komu ákveðnir til leiks og ætluðu augljóslega ekki að láta Stólana komast upp með einhverja sirkustakta í sínu húsi. Það reyndist Tindastólsmönnum þungt í skauti að Urald King og Viðar voru snöggir að koma sér í villuvandræði. Ekki hjálpaði til að hinn háaldraði Jón Arnór Stefánsson gaf árunum og slitnum löppum langt nef og hreinlega vann leikinn fyrir Vesturbæinga. Lokatölur voru 93-86 eftir spennandi lokamínútur.

Nú stendur yfir undirbúningur vegna fyrirhugaðrar nýbyggingar Byggðastofnunar að Sauðármýri 2 á Sauðárkróki. Byggingin mun verða 998 m² á tveimur hæðum og með kjallara undir hluta hússins. Verkefnið hefur verið unnið samkvæmt aðferðarfræði upplýsingalíkana mannvirkja (Building Information Modeling - BIM) og aðferðafræði vistvænnar hönnunar. Stefnt er að því að byggingin verði vottuð sem vistvænt mannvirki samkvæmt alþjóðlega vottunarkerfinu BREEAM. Verkinu skal vera að fullu lokið 30. september 2019.

Hætt hefur verið við að loka hraðbankanum á Hofsósi eins og ráðgert hafði verið og hann kominn í gagnið á ný. Í svörum frá Arion banka segir að stöðugt sé verið að skoða hvar sé best að hafa hraðbanka og hvernig best er að haga þjónustunni. „Töluverður kostnaður fylgir rekstri hvers hraðbanka og á Hofsósi var notkunin það lítil að við töldum ekki forsendur fyrir því að hafa hraðbanka þar áfram,“ segir Haraldur Guðni Eiðsson, upplýsingafulltrúi bankans.

Jón E. Friðriksson hefur látið af störfum sem framkvæmdastjóri FISK Seafood ehf. en Jón hefur starfað hjá fyrirtækinu í 22 ár og stýrt þar kröftugri uppbyggingu og daglegum rekstri af mikilli elju, eins og segir í fréttatilkynningu frá félaginu. Stjórni Fisk Seafood þakkar Jóni farsælt og gott starf.

Sveitarstjórn Húnavatnshrepps samþykkti á fundi sínum þann 24. október sl. að óska eftir því við Iceland Excursions Allrahanda ehf. að félagið kaupi allt hlutafé sveitarfélagsins í Hveravallafélaginu ehf. Í maí 2013 gerðu þáverandi hluthafar í Hveravallafélaginu og Iceland Excursions Allrahanda um kaup síðarnefnda félagsins á hlutafé í Hveravallafélaginu og innihélt samningurinn ákvæði um að félagið væri skuldbundið að kaupa eldra hlutafé eftir fimm ár á genginu 1, ef hluthafar óski þess.

Kómedíuleikhúsið verður á ferðinni á Blönduósi í kvöld, föstudag 2. nóvember, og sýnir hinn vinsæla leik, Sigvaldi Kaldalóns, í félagsheimilinu klukkan 20:00. Leikurinn var frumsýndur árið 2013 og naut mikilla vinsælda og snýr nú aftur á svið og hefur meðal annars verið sýndur í Hannesarholti í Reykjavík undanfarið við góðra undirtektir.

Á einhverju Facebook rúllinu mínu um daginn þá sá ég að einhver hefði unnið einhverja keppni með Bounty köku en því miður las ég aldrei fréttina. Í síðustu viku fékk ég svo þörf til að baka en fann ekki þessa vinningsuppskrift, en fann fullt af öðrum girnilegum uppskriftum. Ég endaði á einhverri erlendri bökunarsíðu og lét Google þýða fyrir mig yfir á íslensku og viti menn.... kakan varð bara þokkalega góð hjá mér og heitir hún Kókoskladdakaka.