Fréttir

Kór eldri borgara á Akureyri “Í FÍNU FORMI” heldur tónleika í Félagsheimili Hvammstanga á morgun, þriðjud.15. maí kl. 17:00. Söngstjóri er Petra Björk Pálsdóttir, meðleikari Valmar Valjaots og einsöngvari Þór Sigurðsson. Allir eru hjartanlega velkomnir og enginn aðgangseyrir, segir í tilkynningu frá kórnum.

Á heimasíðu Þekkingarsetursins á Blönduósi segir frá því að Elsa Arnardóttir hafi verið ráðin forstöðumaður setursins frá og með 1. maí 2018. Var hún valin úr hópi fimm umsækjenda um stöðuna sem auglýst var í byrjun ársins.

Það gætir einhvers misskilnings í aðdraganda kosninga um breytt verklag á fjölskyldusviði hjá Sveitarfélaginu Skagafirði. Álfhildur Leifsdóttir, starfsmaður Sveitarfélagsins Skagafjarðar og frambjóðandi á lista Vinstri grænna og óháðra, ritar grein sem birt er í fréttablaðinu Feyki. Þar fer hún yfir hvernig þessi tíðindi bárust henni og fullyrðir ranglega að stöður hjá sveitarfélaginu séu almennt ekki auglýstar. Sem sveitarstjóri og þar með æðsti yfirmaður starfsmanna sveitarfélagsins tel ég mig knúna til að leiðrétta þennan misskilning.

Örn Þórarinsson, 67 ára bóndi á Ökrum í Fljótum, er innfæddur Fljótamaður og hefur búið á Ökrum frá níu ára aldri. Ásamt búskapnum rekur Örn fornbókaverslun sem hann hefur starfrækt frá árinu 2008 og hefur umfang starfseminnar farið vaxandi ár frá ári og selur hann bækur um allt land, bæði til þeirra sem kaupa bók og bók á stangli en þó mest til safnara. Kveikjan að fornbókaversluninni var sú að Örn fór að huga að einhverju til að hafa fyrir stafni á efri árunum og hvað er þá betra en að sameina atvinnu og áhugamál? Örn svaraði spurningum í þættinum Bók-haldið í 7. tbl. Feykis 2017

Í síðustu grein minni hér í Feyki rakti ég ögn sögufræg dómstörf á landsmótinu á Þveráreyrum 1954. Þá varð sá einstaki atburður að meirihluti dómnefndar bar formanninn – hrossaræktarráðunautinn - ofurliði, Gunnar Bjarnason þáverandi hrossaræktarráðunautur segir á einum stað í starfssögu sinni, að: „Norðlendingarnir, undir forystu Jóns bónda á Hofi, höfðu ákveðið að láta til skarar skríða á þessu landsmóti og láta dæma hornfirzku hestana, ættirnar út af Blakk (129), Skugga (201), Nökkva (260) og Svip (385) út úr reiðhestarækt á Íslandi fyrir fullt og allt.“.

Sumir halda að krakkar nú til dags hafi engan áhuga á bóklestri. Það er þó ekki alls kostar rétt og sumir eru meira að segja svo framtakssamir að grípa til sinna ráða ef þeim finnst úrvalið á skólabókasafninu ekki vera nógu gott. Blaðamaður Feykis hitti þessa kátu krakka í góða veðrinu framan við kaupfélagið á Hofsósi í gær þar sem þeir héldu tombólu til styrktar skólabókasafninu á Hofsósi.

Sundlaugin á Hofsósi verður lokuð í dag og á morgun vegna skemmda sem urðu þar í rafmagnsleysinu í gær. Þorvaldur Gröndal, forstöðumaður frístundamála hjá Sveitarfélaginu Skagafirði, gat lítið tjáð sig um umfang skemmdanna þegar Feykir hafði samband við hann en þær verða kannaðar nánar í dag.

Þann 2. maí barst mér tölvupóstur þar sem tilkynnt var um nýtt skipurit fyrir fjölskyldusvið sveitarfélagsins Skagafjarðar, breytingar sem tóku gildi 1. maí. Tilgangur breytinganna er sagður vera að samþætta þjónustu sem veitt er á fjölskyldusviði. Staða sviðsstjóra og fræðslustjóra sem áður var eitt stöðugildi er gerð að tveimur og búin er til staða verkefnastjóra sem á að sinna ýmsum verkefnum.

„Það er fátt betra en gott salat eða pestó á kexið eða snittubrauðið og gaman að geta boðið upp á þess háttar gúmmelaði, auk hins hefðbundna camembert osts og vínberja. Ekki skemmir fyrir hafa smá rautt eða hvítt með, eftir smekk, og að sjálfsögðu að kveikja á kertaljósum. Hér eru nokkrar hrikalega góðar uppskriftir sem hafa verið á boðstólnum hjá mínum saumaklúbbi en það ber að varast að það er með eindæmum erfitt að hætta borða eftir að byrjað er," segir í matgæðingaþætti Feykis í 20. tbl. ársins 2016. Þar birtust nokkrar uppskriftir sem henta vel í saumaklúbbinn og örugglega ekki síður í Eurovisionpartýið sem vafalaust verður haldið víða í kvöld.

Berglind konan mín skoraði á mig að taka við áskorendapenna Feykis í blaðinu fyrir nokkru. Ég tók þeirri áskorun eins og hverju öðru hundsbiti, án þess að hafa hugmynd um hvað ég ætti að segja sem erindi gæti átt við lesendur blaðsins. Ég gæti þá alltaf talað um einhver verkefni mín sem minjavörður Norðurlands vestra ef ekki félli annað til, t.d. sagt frá ástandi strandlengjunnar í Skagafirði og Húnavatnssýslum og þeirri hættu sem steðjar að strandminjum sökum sjávarrofs. Þar er af nógu að taka enda ástandið verulegt áhyggjuefni á stórum svæðum.