Fréttir

Hið árlega Gamlársdagshlaup verður þreytt samkvæmt venju frá Íþróttahúsinu á Sauðárkróki á morgun síðasta degi ársins en lagt verður af stað klukkan 13:00. Vegalengdir að eigin vali, þó að hámarki 10 km. Allir eru hvattir til að taka þátt, fólk getur gengið, skokkað eða hjólað allt eftir eigin höfði.

Árlegt jólaball var haldið í Melsgili á mánudaginn. „Skemmtunin hófst með því að Guðrún Kristín Eiríksdóttir las upp söguna „Snuðra og Tuðra í jólaskapi.“ Geirmundur spilaði fyrir dansi og barnabarn hans, Anna Karen Hjartardóttir söng með sinni björtu og fallegu rödd,“ eins og segir í texta sem fylgdi meðfylgjandi myndum.

Flugbjörgunarsveitin í Varmahlíð, Björgunarsveitin Skagfirðingasveit og Björgunarsveitin Grettir á Hofsósi hafa hafið flugeldasölu en allur ágóði flugeldasölunnar rennur til björgunarstarfsins. Flugeldasalan er mikilvægasta fjáröflun sveitanna og stendur undir stórum hluta af rekstri þeirra yfir árið.

Brenna og flugeldasýning verða á sínum stað á gamlárskvöld á Blönduósi á vegum Björgunarfélagsins Blöndu. Í Glugganum segir að kveikt verði í brennunni kl. 20:30 og hefst flugeldasýningin skömmu síðar. „Verið er að safna styrktaraðilum að flugeldasýningunni til að hún verði enn glæsilegri en áður,“ segir í auglýsingunni. Flugeldasala er aðal fjáröflun Björgunarsveitanna.

Stofnfundur Menningarfélags Húnaþings vestra verður haldinn í kvöld, þriðjudaginn 29. desember, klukkan 21:00 í Bókasafni Húnaþings vestra, Höfðabraut 6 á Hvammstanga. Tilgangur félagsins verður að hlúa að og styðja við hvers kyns menningarstarfsemi í Húnaþingi vestra.

Björgunarbáturinn Húnabjörg kom 9 tonna fiskibáti til aðstoðar úti á Húnaflóa í dag og fylgdi honum til hafnar á Skagaströnd. Báturinn hafði fengið á sig brotsjó og komst sjór í stýrishús og vistarverur. mbl.is greinir frá.

Í dag er suðaustan 10-15 og él á Ströndum og Norðurlandi vestra. Hiti um frostmark. Mjög djúp lægð gengur yfir landið með vaxandi austan- og norðaustanátt í kvöld, 18-23 m/s og slydda í nótt. Hægari um tíma í fyrramálið en snýst síðan í hvassa suðvestanátt, allt að 18-25 m/s á Norðurlandi með éljum eða slydduéljum og lélegu skyggni. Samkvæmt vef Vegagerðarinnar verður ferðaveður með versta móti víðast hvar í kvöld og nótt.

Þóranna Ósk Sigurjónsdóttir frjálsíþróttakona úr Tindastóli var valinn Íþróttamaður Ungmennasambands Skagafjarðar UMSS 2015 í hófi sem haldið í Húsi frítímans á Sauðárkróki, sunnudaginn 27. desember. Hún var valinn einnig Íþróttamaður UMF Tindastólls 2015.

Stúlka, sem slasaðist al­var­lega í vélsleðaslysi í Aust­ur-Húna­vatns­sýslu á laugardag, var út­skrifuð af gjör­gæslu­deild í gær og ligg­ur á Barna­spítala Hrings­ins, sam­kvæmt heimildum mbl.is. Stúlkurnar voru tvær á sleðanum þegar slysið varð en hin stúlk­an var út­skrifuð af Land­spít­al­an­um eft­ir skoðun á laugardagskvöld en hún var farþegi á sleðanum.

Karlakórinn Lóuþrælar hélt nýverið jólatónleika á Borðeyri og á Hvammstanga. Tónleikarnir voru þeir fyrstu undir stjórn nýs kórstjórnanda, Daníels Geirs Sigurðssonar, sem tók við að stýra kórnum nú í haust. Á tónleikunum flutti kórinn ýmis ljúf jólalög, íslensk og erlend.