Hestar

Fimmtán stóðhestar voru skráðir til leiks í fimmgangskeppni KS-Deildarinnar sem fram fór í reiðhöllinni á Sauðárkróki gærkvöldi. Stefndi því í mikla stóðhestaveislu en einnig voru spennandi hryssur skráðar. Þórarinn Eymundsson og Narri frá Vestri Leirárgörðum voru efstir eftir forkeppni með einkunnina 7,03.

Annað mót Húnvetnsku liðakeppninnar fór fram föstudaginn 3. mars þar sem fjólubláa liðið sigraði en fast á hæla þeirra kom það gula. Frábært kvöld og allir kátir segir á heimasíðu hestamannafélagsins Þyts.

Það má segja að um sannkallaða stóðhestaveislu verði að ræða í KS-Deildinni á morgun miðvikudag, en fimmtán stóðhestar eru þá skráðir til leiks í fimmgangi. Keppnin fer fram sem fyrr í Svaðastaðahöllinni á Sauðárkróki og hefst kl 19:00.

Fyrsta keppniskvöld KS deildarinnar fór fram í gærkvöldi í reiðhöllinni á Sauðárkróki og var keppt í fjórgangi. Artemisia Bertus og Korgur frá Ingólfshvoli stóðu uppi sem sigurvegarar eftir að hafa leitt forkeppnina með einkunnina 7,23. Í úrslitum hlutu þau einkunnina 7,50 sem dugði til sigurs eins og áður sagði. Þetta er annað árið í röð sem þau sigra þessa grein.

Fyrsta keppni KS-Deildarinnar hefst í kvöld kl 19:00 í Svaðastaðahöllinni á Sauðárkróki. Artemisia Bertus og Korgur frá Ingólfshvoli sigruðu þessa grein glæsilega í fyrra og mæta þau aftur í höllina á morgun. Athygli vekja ungar hátt dæmdar hryssur sem eru að stíga sín fyrstu skref á keppnisbrautinni. Þarna eru líka reyndir keppnishestar og gefur ráslistinn góð fyrirheit um spennandi keppni.

Sjöunda og síðasta liðið sem kynnt er til leiks í KS-Deildinni er lið Líflands. Tamningakonan og tveggja barna móðirin Fanney Dögg Indriðadóttir úr Húnaþingi er liðsstjóri þess en hún hefur verið á keppnisbrautinni frá unga aldri og ætíð staðið sig vel. Fanney vekur ávallt athygli fyrir fágaða reiðmennsku og er útskrifaður reiðkennari frá Hólum.

Sjötta og næst síðasta liðið sem kynnt er til leiks í KS-Deildinni er Draupnir-Þúfur og viðeigandi að liðsstjórinn sé Mette Mannseth. Mette mætir örugglega vel hestuð í allar greinar enda er hún ætíð vel undirbúin fyrir keppnir svo það má vænta mikils af henni í vetur.

Fimmta liðið sem kynnt er til leiks í KS-Deildinni er Hofstorfan 66°norður en þar er stórbóndinn Elvar E. Einarsson liðsstjóri og hefur aga á sínu liði. Elvar er nánast óþarft að kynna, mikill keppnismaður sem gefur ekkert eftir þegar í brautina er komið. Snjall skeiðreiðarmaður.

Fjórða liðið sem kynnt er til leiks í KS-Deildinni er lið Mustad en þar er liðstjórinn Sina Scholz. Sina stundar tamningar á Sauðárkróki en hún er útskrifaður reiðkennari frá Hólum og hefur unnið hjá nokkrum fremstu knöpum landsins. Hún vakti athygli í fyrra með hest sinn Nóa frá Saurbæ.

Þriðja liðið sem kynnt er til leiks í KS-deildinni er Íbess/TopReiter. Jóhann B. Magnússon kúabóndi á Bessastöðum í Húnaþingi vestra er liðsstjórinn, harðsnúinn keppnismaður, fluglaginn og vel hestaður. Litli bróðir Jóa, Magnús Bragi Magnússon á Íbishóli, er þarna innanborðs, þekktur um allan heim og kemur sífellt á óvart.