Fréttir

Samtök sveitarfélaga á Norðurlandi vestra hafa birt Sviðsmyndir atvinnulífs á Norðurlandi vestra á vef sínum þar sem dregnar eru upp fjórar mismunandi myndir af stöðu mála í landshlutanum árið 2040 út frá ólíkum forsendum. Sviðsmyndirnar voru unnar af KPMG í tengslum við gerð nýrrar sóknaráætlunar landshlutans á síðasta ári.

Þriðjudaginn 7. apríl var haldinn „fundur“ í Veðurklúbbi Dalbæjar sem var með öðru sniði að þessu sinni vegna hinna fordæmalausu aðstæðna sem allir þekkja. Spámenn komu ekki saman heldur var hver og einn tekinn tali einslega, eftir því sem fram kemur í tilkynningu frá klúbbnum. Flestallir voru á því að rétt hafi verið spáð fyrir um áttirnar í mars en mánuðurinn var heldur harðari en gert var ráð fyrir.

Hin smitandi veirusýking, Covid 19, sem nú gengur yfir hefur haft mikil áhrif á allt mannlíf í Íslandi. Nú hafa um 1600 manns verið greindir með veiruna sem veldur sjúkdómnum, þar af 35 á Norðurlandi vestra. Góðu fréttirnar eru þær að fólk er að ná sér aftur og hafa nú 460 manns náð bata, þar af 16 á Norðurlandi vestra. Þrátt fyrir þessar góðu fréttir verðum við samt áfram að vera á tánum.

Í Samráðshóp um áfallahjálp í Skagafirði sitja fulltrúar Rauða Krossins, þjóðkirkju, sveitafélagsins Skagafjarðar, heilsugæslu og lögreglu. Samráðshópurinn vill færa fram kærar þakkir til heilbrigðisstarfsfólks, skólasamfélagsins, starfsfólks velferðarþjónustu og allra viðbragðsaðila fyrir mikla og óeigingjarna vinnu. Einnig vill hópurinn þakka íbúum fyrir stuðning og hjálpsemi við náungann, sem einkennist af samstöðu, þolinmæði og æðruleysi.

Að öllu eðlilegu væri úrslitakeppni Dominos deildarinnar í körfubolta í hámarki þessa dagana og félögin að fá tekjur inn í reksturinn sem þeim eru mikilvægar svo allt gangi eins og á að gera. En vegna Covid 19 verður tímabilið 2019/2020 ekki klárað og því enginn úrslitakeppni en fólk getur samt lagt sitt af mörkum og keypt sig inn á draugaleiki.

Á morgun, miðvikudaginn 8. apríl, verða REKO afhendingar á Blönduósi og Sauðákróki þar sem neytendur geta pantað vörur milliliðalaust frá framleiðendum á svæðinu.

Það var ófögur sjón sem blasti við jeppamönnum þegar þeir komu í skálann við Ströngukvísl á Eyvindarstaðaheiði um helgina, segir á RÚV, en rúða í einum glugga hafði verið brotin, annar gluggi skilinn eftir opinn og í kjölfarið hafði fennt inn um allt hús. Fimm félagar úr Húnvetningadeild ferðaklúbbsins 4X4 höfðu farið á tveimur bílum í eftirlitsferð í Ströngukvíslarskála á Eyvindarstaðaheiði, en ekki hafði verið farið í skálann síðan í byrjun janúar.

Samtök sveitarfélaga á Norðurlandi vestra, í samstarfi við Nýsköpunarmiðstöð Íslands, stóðu fyrir vinnustofum á netinu í síðustu viku. Efni vinnustofanna var hvernig auka má sölu í gegnum netið og voru þær hluti af verkefninu Digi2Market sem fjármagnað er að hluta til af Norðurslóðaáætlun. Vinnustofurnar fóru fram í gegnum fjarfundaforrit og var streymt á Youtube síðu samtakanna.

Samkvæmt tölum frá aðgerðastjórn almannavarna Norðurlands vestra sæta nú 23 einstaklingar einangrun á svæðinu, flestir á Hvammstanga eða tólf manns, sex í dreifbýli Húnaþings vestra, þrír á Sauðárkróki og tveir í Hrútafirði. Alls eru 60 manns í sóttkví en 408 sem hafa lokið henni. Þrettán manns hafa náð bata á Norðurlandi vestra.

Félagsmálaráðuneytið, heilbrigðisráðuneytið og embætti landlæknis hafa tekið höndum saman við útgáfu góðra ráða til foreldra á tímum COVID-19 faraldursins. Eru ráðleggingarnar meðal annars unnar í samstarfi við Alþjóðaheilbrigðismálastofnunina (WHO) og UNICEF.