Fréttir

Það getur ýmislegt óvænt borið fyrir sjónir fólks þegar það er á heilsubótargöngu. Ingvi Guðmunds og Kristrún Péturs kíktu inn til Feykis upp úr hádegi í dag eftir að gengið fram á fálka að gæða sér á, að því er virtist, öðrum fálka litlum 100 metrum frá skrifstofu Feykis, eða í nágrenni við dælustöð ÓB á Sauðárkróki.

Hjá bókaútgáfunni Sæmundi á Selfossi kom út fyrir jólin bókin Kindasögur, 2. bindi, eftir Aðalstein Eyþórsson og Guðjón Ragnar Jónasson. Fyrra bindi Kindasagna kom út á síðasta ári og hlaut afbragðsgóðar viðtökur landsmanna. Höfundarnir ákváðu því að bæta við öðru bindi með fleiri frásögnum af afrekum og uppátækjum íslenskra kinda.

Eins og flestum mun vera kunnugt verða ekki haldnar áramótabrennur þetta árið þó margir vildu sjálfsagt sjá árið sem er að líða fuðra upp á góðum bálkesti. Engu að síður verða þó haldnar flugeldasýningar á vegum björgunarsveitanna á morgun, rétt eins og venja er, en þó verður sums staðar brugðið út af hefðinni varðandi tíma og staðsetningu.

Á Facebook-síðu Handbendi brúðuleikhúss á Hvammstanga segir frá því að árið 2021 marki upphaf nýrra og spennandi verkefna. Ljóst er að alþjóðlega brúðulistahátíðin á Hvammstanga verður haldin næsta haust og þá hefur Handbendi fengið lífsnauðsynlega styrki vegna verkefna ársins og munar þar mest um styrk úr EES-sjóðnum vegna samstarfsvekefnisins Caravan.

„Það skemmtilegasta, sem kemur upp í huga minn þegar ég lít til baka á árið, eru uppákomur Eika Hilmis, sem hann deildi með samferðafólki sínu á Facebook,“ segir Ingi Jónasson þegar hann er inntur eftir því hvað hafi verið broslegast á árinu. Ingi, kannski best þekktur sem Ingi Vaff hér heima, er gamall Feykispenni en stendur nú við stýrið hjá hugbúnaðarfyrirtækinu Aptic og gerir út frá Skövde í Svíaríki. Hann er hrútur, notar skóbúnað í númerinu 45 og segist hafa lært margt nýtt á árinu sem er að líða.

Lögreglan á Norðurlandi vestra, ásamt Brunavörnum á svæðinu vilja vekja athygli íbúa á því að ekki er heimilt að losa úrgang utan viðurkenndra móttökustöðva sorps. Sama á við um brennslu úrgangs utan viðurkenndra brennslustöðva.

Grænbók um byggðamál, sem ætlað er að meta stöðu byggðamála og vera grundvöllur fyrir nýja stefnumótun í byggðamálum til fimmtán ára, hefur verið birt í samráðsgátt stjórnvalda. Allir hafa tækifæri til að senda inn umsögn eða ábendingar um grænbókina en frestur til að skila umsögn er til og með 25. janúar 2021.

Framkvæmdum á Blönduósflugvelli er lokið en ein af tillögum átakshóps ríkisstjórnarinnar um úrbætur í innviðum sem kynnt var snemma á þessu ári sneri að viðhaldi vallarins. Miðað var að því að tryggja að völlurinn yrði nothæfur fyrir sjúkraflug en í aðgerðalýsingu úrbóta fyrir völlinn er það tiltekið að vegna staðsetningar hans við þjóðveg eitt sé hann mikilvægur þegar slys verða á fólki og mínútur skipta máli.

Hofssókn á Hofsósi hefur höfðað mál fyrir Héraðsdómi Norðurlands vestra í þeim tilgangi að geta afhent Lilju Pálmadóttur Hofskirkju sem stendur á jörð Lilju, Hofi á Höfðaströnd.

Björgunarsveitirnar standa að vanda fyrir flugeldasölu fyrir áramótin og er hún í flestum tilfellum þeirra stærsta fjáröflunarleið. Salan hófst í gær og stendur fram á gamlársdag en auk þess verður opið á þrettándanum á einhverjum stöðum. Minnt er á grímuskyldu og takmarkaðan fjölda viðskiptavina en að þessu sinni bjóða margar sveitanna einnig upp á netverslun.