Íþróttir

ÍR átti ekki í vandræðum með Stólastúlkur þegar liðin mættust í Seljaskóla í gær. Fyrir leikinn var lið Breiðhyltinga taplaust í efsta sæti 1. deildarinnar og þær bættu sjöunda sigrinum við en úrslitin réðust í öðrum leikhluta þegar þær mokuðu yfir gestina og unnu leikhlutann 21-2. Lokatölur leiksins voru hins vegar 66-38.

Skagfirski varnarjaxlinn Loftur Páll Eiríksson, sem leikið hefur með liði Þórs Akureyri síðustu árin, hefur skipt úr Lengju-deildinni upp í Pepsi Max en hann gekk í dag, samkvæmt frétt á mbl.is, frá félagaskiptum yfir í lið Leiknis Reykjavík. Leiknismenn hafa ekki leikið í efstu deild síðan sumarið 2015 en þeir voru í öðru sæti Lengju-deildarinnar þegar tímabilið var flautað af fyrir síðustu áramót.

Það er enginn lurkur í Skagafirði þrátt fyrir smá gadd, bara blíðan með sólgleraugum og öllu tilheyrandi. Skíðaáhugafólk ætti að geta rennt sér í paradísinni á skiðasvæði Tindastóls sem verður opið í dag frá 13-21.

Lið Tindastóls fékk kanalausa Grindvíkinga í heimsókn í Síkið í gærkvöldi og niðurstaðan var góður sigur en lokatölurnar voru 88-81. Þrátt fyrir að Stólarnir hefðu haft yfirhöndina mest allan leikinn þá var það ekki fyrr en Jaka Brodnik skellti í sjö stiga syrpu á næst síðustu mínútu leiksins sem ljóst var að heimamenn myndu hirða stigin tvö sem í boði voru.

Síðastliðinn föstudag tóku unglingar í Húnaþingi vestra þátt í rafíþróttamóti Samfés þar sem keppt var í CS:GO og Fortnite. Samtals kepptu sjö krakkar frá Húnaþingi vestra, fjórir í CS:GO og þrír í Fortnite. Lið Órions var skipað fjórum heimamönnum, auk varamanns frá Danmörku sem hoppaði inn með skömmum fyrirvara eftir að einn liðsmaður forfallaðist. Liðið hittist í Órion þar sem komið hafði verið upp tímabundnu tölvuveri fyrir keppnina.

Nýr landsliðsþjálfari íslenska kvennalandsliðsins, Þorsteinn H. Halldórsson, hefur valið 26 leikmenn til að taka þátt í æfingum í næstu viku en allar stúlkurnar í hópnum leika á Íslandi. Einn leikmaður úr liði Tindastóls er í hópnum, Laufey Harpa Halldórsdóttir, en að öllum líkindum er hún fyrsti meistaraflokksleikmaðurinn sem er valinn í æfingahóp landsliðsins sem leikmaður Tindastóls.

Íslenski landsliðsmaðurinn og Skagfirðingurinn Rúnar Már Sigurjónsson hefur komist að samkomulagi við Astana um að rfita samningi sínum við félagið og hefur nú fært sig um set því í framhaldinu skrifaði hann undir tveggja ára samning við rúmenska stórliðið CFR Cluj sem hefur af og til leitt gæðinga sína fram á sparkvelli Meistaradeildarinnar í knattspyrnu.

Lið Tindastóls og Völsungs mættust í Kjarnafæðimótinu í knattspyrnu í Boganum á Akureyri í gær. Það er skemmst frá því að segja að Stólastúlkur reyndust talsvert sterkari aðilinn og skoruðu tvö mörk í sitt hvorum hálfleik og lokatölur því 4-0.

Lið Tindastóls var lítil fyrirstaða fyrir sterkt lið Keflavíkur þegar liðin mættust í Sláturhúsinu suður með sjó í gærkvöldi. Stólarnir héldu í við heimamenn í fyrri hálfleik en voru níu stigum undir í hálfleik, 48-39. Í þriðja leikhluta stigu Keflvíkingar bensínið í botn og Stólarnir virkuðu bæði orku- og ráðalausir. Lokatölur 107-81 og hollingin á okkar piltum ekki par góð.

Tindastóll sýndi góðan leik er Israel Martin mætti með lærisveina sína í Haukum á sinn gamla heimavöll, Síkið á Sauðárkróki, í gær. Stólar mættu vel gíraðir og tilbúnir í leikinn og létu forystuna aldrei af hendi allt frá upphafi til enda leiksins. Lokatölur 86 – 73. Nikolas Tomsick átti fínan leik í gær og hóf stigaskor Stóla um mínútu eftir að ágætir dómarar blésu til leiks. Um miðjan fyrsta leikhluta höfðu heimamenn bætt við tólf stigum en Haukar aðeins gert tvö og staðan 14:2.