Íþróttir

Bikarævintýri Tindastóls er á enda í bili eftir að Stjarnan kom, sá og sigraði ríkjandi Maltbikarmeistara af miklu öryggi í Síkinu í gærkvöldi. Stjarnan náði frumkvæðinu strax í byrjun leiks og þrátt fyrir ágætan sprett í öðrum leikhluta náðu Stólarnir aldrei að jafna leikinn. Vægt til orða tekið þá komu Tindastólsmenn marflatir til leiks í þriðja leikhluta og gestirnir gengu á lagið og stungu Stólana af. Lokatölur leiksins 68-81.

Í kvöld fer fram risaslagur í Geysisbikarnum er lið Stjörnunnar mætir ríkjandi bikarmeisturum í Síkinu á Sauðárkróki. Gestirnir, sem hafa verið á ágætum spretti í síðustu leikjum, ætla sér stóra hluti enda spáð toppsæti í deildinni í upphafi leiktíðar. „Ef við fáum troðfullt hús aukast líkurnar á því að við förum í Höllina til muna.“

Knattspyrnudeild Tindastóls hefur samið við Jackie Altschuld um að leika með meistaraflokki kvenna næsta tímabil. Jackie er fædd 1995, fjölhæfur leikmaður sem getur spilað vörn, miðju og sókn.

Það var hörkuleikur í 1. deild kvenna í körfunni í dag þegar lið Tindastóls tók á móti baráttuglöðum Þórsurum í Síkinu. Akureyringarnir höfðu unnið fyrri leik liðanna á Akureyri fyrr í vetur í spennuleik og ekki var leikurinn í dag minna spennandi og endaði með því að fara í framlengingu. Þar reyndist tankurinn tómur hjá Tindastóli og lið Þórs, með Sylvíu Rún Hálfdanardóttur í banastuði, sigraði næsta örugglega. Lokatölur 80-89 eftir að staðan var 78-78 að loknum venjulegum leiktíma.

Tindastólsmenn héldu í víking suður í Hafnarfjörð í gær og léku þar við lið Hauka sem hefur átt á brattann að sækja í vetur. Ekki hljóp beinlínis á snærið hjá okkar mönnum sem komu tómhentir heim í Skagafjörð eftir frammistöðu þar sem töluvert skorti upp á gleði og baráttu auk þess sem skyttur Stólanna voru langt frá því að fylla sinn kvóta. Eftir að hafa leitt í hálfleik, 38-41, þá gekk sóknarleikur Tindastóls illa í síðari hálfleik og Hafnfirðingar sem sigruðu að lokum 73-66.

María Finnbogadóttir, skíðakona í Tindastól, náði 6. sætinu í svigi í Turnau í Austurríki, sunnudaginn 13. janúar sl. Alls voru 33 þátttakendur í mótinu og hlaut María 49.40 FIS stig fyrir árangurinn, sem er hennar besti árangur á ferlinum.

Það var heldur betur boðið upp á dramatík í Síkinu þegar Tindastóll og Njarðvík mættust nú á laugardaginn í 1. deild kvenna. Lið Njarðvíkur hafði náð sextán stiga forystu fyrir hlé og allt leit út fyrir að gestirnir tækju stigin tvö með sér heim án verulegra vandræða. Eitthvað fínerí hefur Arnoldas boðið Stólastúlkum upp á í hálfleik því þær komu tvíefldar til leiks í þeim seinni með Tess Williams í hrikalegu stuði og komu leiknum í framlengingu. Eftir líflega og æsispennandi framlengingu fagnaði lið Tindastóls frábærum sigri. Lokatölur 97-93.

Lið Tindastóls og Vals mættust í 13. umferð Dominos-deildarinnar í körfubolta í Síkinu í gærkvöldi. Stólarnir mættu laskaðir til leiks því í liðið vantaði þá Pétur Birgis og Urald King sem báðir glíma við meiðsli en á móti kom að Valsmenn voru búnir að skipta út Könum. Leikurinn reyndist æsispennandi en það voru Valsarar sem höfðu yfirhöndina mest allan leikinn og voru í raun dæmalausir klaufar að ná ekki sigri. Danero jafnaði leikinn með ruglþristi þremur sekúndum fyrir leikslok og í framlengingunni reyndust Stólarnnir reynslumeiri og nældu í dýrmætan sigur. Lokatölur 97-94.

Í gær gekk Knattspyrnufélag ÍA á Akranesi frá samningi við hinn bráðefnilega Króksara, Jón Gísla Eyland Gíslason, en Skagamenn leika í efstu deild á komandi sumri. Jón Gísli gengur til liðs við KFÍA frá Tindastóli en hann er fæddur 2002 og hefur þegar spilað 37 leiki með 2. deildar liði Tindastóls og skorað eitt mark. Þá hefur Jón Gísli leikið 13 leiki með U-17 ára landsliði Íslands og þrjá leiki með U-16.

Kvennalið Tindastóls sótti lið ÍR heim í Breiðholtið um liðna helgi. Stólastúlkur höfðu unnið fyrsta leik liðanna í haust en mættu að þessu sinni til leiks með hálf vængbrotið lið og sunnanstúlkur gengu á lagið. Lokatölur voru 91-52.