Fréttir

Nýlega undirrituðu Samtök sveitarfélaga á Norðurlandi vestra (SSNV) samning um vinnu við stöðugreiningu á kolefnisspori Norðurlands vestra í heild snni. Verkefnið felur í sér úttekt á helstu orsakavöldum kolefnislosunar, svo sem í samgöngum, landbúnaði, sjávarútvegi, iðnaði og neyslu íbúa. Eftir að þær niðurstöður eru fengnar verða möguleikarnir greindir á minnkun á losun kolefnis annars vegar og hins vegar á því hvaða mótvægisaðgerðir koma helst til greina í landshlutanum. Frá þessu er sagt á vef SSNV.

Opnunartími sundlaugarinnar í Varmahlíð lengist frá og með deginum í dag, föstudeginum 26. október, og verður svo meðan framkvæmdir standa yfir við Sundlaug Sauðárkróks sem lokuð er um óákveðinn tíma vegna framkvæmda.

Búið er að opna fyrir umsóknir í Uppbyggingarsjóð Norðurlands vestra. Umsóknarfrestur er til kl. 16:00 fimmtudaginn 22. nóvember 2018. Sækja skal um styrki rafrænt á Sóknaráætlun Norðurlands vestra. Umsækjendur þurfa að skrá sig inn með íslykli eða rafrænum skilríkjum. Sé umsækjandi ekki með íslykil er hægt að sækja um hann á island.is.

Á Lýtingsstöðum í Skagafirði er rekin ferðaþjónusta þar sem íslenski hesturinn gegnir lykilhlutverki. Torfhús hafa verið hlaðin á jörðinni sem hýsa annarsvegar hross og hins vegar gömul reiðtygi o.fl. tengt gömlum búskaparháttum og vakið hafa óskipta athygli gesta. Karl Eskil Pálsson, sjónvarpsmaður á N4, heimsótti Evelyn Ýr ferðamannabónda og forvitnaðist m.a. um torfhúsin og réttina sem stendur þar hjá, hlaðin er úr torfi og grjóti.

Tími vetrardekkja er kominn víða um land, sér í lagi á heiðum. Hjá mörgum er það fastur liður að skipta um dekk tvisvar á ári á meðan aðrir eru á dekkjum sem notuð eru bæði sumar og vetur. Hvaða gerð sem notuð er, skiptir öllu að dekkin séu góð. Á veturna á mynstursdýptin að vera a.m.k. 3 mm og gripið gott, sama í hvaða aðstæðum ekið er í.

Það var skellt í almennilega veislu í Síkinu í kvöld þegar Njarðvíkingar komu í heimsókn. Fyrstu tvær mínútur leiksins litu gestirnir nokkuð vel út en næstu 25 mínúturnar þar á eftir léku Stólarnir líkt og töframenn og þar fór Pétur Birgis fremstur í sprækum flokki listamanna. Fjórði leikhlutinn var formsatriði og lið Tindastóls fagnaði frábærum sigri í þessum leik toppliða Dominos-deildarinnar. Lokatölur 95-73 og Stólarnir eru nú einir og enn taplausir á toppi deildarinnar.

Á fundi byggðarráðs Húnaþings vestra sl. mánudag var lögð fram til kynningar ályktun frá fundi íbúa við þjóðveg 711, Vatnsnes og Vesturhóp en fjölmennur íbúafundur var haldinn á Hótel Hvítserk þann 10. október sl. þar sem fundarefnið var afleitt ástand vegarins. Í ályktuninni er m.a. skorað a sveitarstjórn að koma til liðs við íbúa við veginn með öllum ráðum og þrýsta á stjórnvöld um úrbætur.

Nes listamiðstöð á Skagaströnd verður með opið hús í dag, fimmtudaginn 25. október, og munu listamenn sem dvelja í miðstöðinni kynna þar listsköpun sína. Húsið verður opið frá klukkan 16:00 til 18:00 og eru allir velkomnir þangað.

Gerð hafa verið drög að samningi milli Nýsköpunarmiðstöðvar Íslands og allra sveitarfélaganna í Húnavatnssýslum um verkefnið Ræsing Húnaþinga. Í fundargerð byggðaráðs Blönduósbæjar frá 9. október sl. segir að markmið verkefnisins sé að efla nýsköpun á landsbyggðinni með öflugu stuðningsverkefni fyrir nýjar atvinnuskapandi hugmyndir og sé þannig í raun samkeppni um góðar viðskiptahugmyndir þar sem einstaklingum, hópum og fyrirtækjum er boðið að senda inn verkefni og vinna í framhaldinu að viðskiptaáætlun undir handleiðslu starfsmanna Nýsköpunarmiðstöðvar.

Í tilefni af 100 ára fæðingarafmæli Rögnvaldar Steinssonar á Hrauni á Skaga verður opnuð sýning á málverkum eftir hann í Búminjasafninu í Lindabæ í Sæmundarhlíð sunnudaginn 28. október kl: 15:00.